Qazaqstandyq sýretshi telejobada kózin baılap alyp músin jasady
ASTANA. QazAqparat - Astanalyq sýretshi Renat Elýbaev reseılik telearnadaǵy erekshe qabileti bar adamdar týraly jobanyń fınalynda kózin baılap alyp, sazdan músin jasady, dep habarlaıdy QazAqparat.
Ol «Rossııa 1» telearnasyndaǵy «Ýdıvıtelnye lıýdı» jobasynyń úshinshi maýsymyndaǵy segizinshi kórsetiliminde kózi baılaýly kúıinde, kartına salǵan bolatyn.
Jobanyń osy maýsymyna tańǵalarlyq qabileti bar álemniń 56 adamy qatysty. 10 adam fınalǵa ótti, solardyń tek bireýine ǵana jeńimpaz kýbogy men basty júlde 1 mln rýbl buıyrady.
Talap boıynsha jeńimpazdy stýdııadaǵy kórermender tańdaıdy. Sondaı-aq olarǵa kómekke jobanyń qonaǵy, telejúrgizýshi Olga Shelest, horeograf, bıshi Evgenıı Papýnaıshvılı, bokstan kásipqoılar arasynda álem chempıony Natalıa Rogozına men Kognıtıvtik neıroǵylymdar ınstıtýtynyń dırektory Vasılıı Klıýcharov keledi.
Tartys mynalardyń arasynda ótti: Zahar German, 6 jasar, Omby qalasynan (Reseı), Artýr Mıkaelıan, 12 jasta, Razdan qalasynan (Armenııa), Ventsel Grıýs, 15 jasta, Bremen qalasy (Germanııa), Tsıýı Tszıanıýı, 13 jasta, Sıamyn (Qytaı), Safııa Salımova, 11 jasta, Antalııa (Túrkııa), Djon Grem, 32 jasta, Solt-Leık-Sıtı (AQSh), Renat Elýbaev, 35 jasta, Astana (Qazaqstan), Rýslan Gavrıýshenko, 44-te, Kıslovodsk (Reseı), Artem Martırosov, 16-da, Máskeý (Reseı), Osman Delıbash, 25-te, Máskeý (Reseı).
Fınalda sýretshi Renat Elýbaev óz talantynyń jańa qyryn kórsetýi kerek boldy. Bul joly ol músinshilik qabiletin tanytty. Qazaqstandyq ózine berilgen músindi kózi baılaýly qalpynda qolymen sıpap-tanyp, ony sazdan kóshirip, aınytpaı jasap shyǵýy tıis edi.
Jobada Renat tuńǵysh ret músindi kórmeı turyp jasaýǵa týra keldi. Joba qonaqtary Renattyń jasaǵan músinine kelgende ekidaı pikir bildirdi. Evgenıı Papýnaıshvılı men Natalıa Rogozına daıyn músin túpnusqaǵa uqsaıdy dese, Olga Shelest pen Vasılıı Klıýcharov áriptesteriniń pikirine qarsy shyqty.
Jobaǵa qatysýshylardyń barlyǵy óz talanttaryn kórsetip bolǵan soń, kórermender daýystaryn eki úmitker - armenııalyq Artýr Mıkaelıan men reseılik Rýslan Gavrıýshenkoǵa berdi. Sońǵy tańdaýdy joba qonaqtary jasady. Olar Rýslan Gavrıýshenkony úzdik dep tanydy. Rýslan kýbok pen bas júldeni ıelendi.
Avtor: Janar Muhamedııarova
