Qazaqstandyq sýretshi Káripbek Kúıikov Ulybrıtanııada jeke kórmesin ótkizdi
Aıta keterligi, Káripbek Kúıikov osydan alty jyl buryn «saýsaq izderi joq» degen jeleýmen Birikken Koroldikke kirýge vıza ala almaǵan edi. Osyǵan baılanysty, týa bitti eki qoly joq qoǵam qaıratkerinen Ulybrıtanııa elshiligi keshirim surap, olqylyqtyń orny endi tolyp otyr, dep habarlaıdy QazAqparat tilshisi.
Káripbek Kúıikov ıadrolyq synaqtardyń úreı týdyrar aýyr zardaptary beınelengen sýretterin Brıtanııa jurtshylyǵyna usynyp qana qoımaı, halyqty ıadrolyq synaqtarǵa tyıym salýǵa baǵyttalǵan ATOM jobasynyń onlaın-petıtsııasyna qol qoıýǵa shaqyrdy.
«London - búkil halyq qulaq asatyn álem astanalarynyń biri. Osynda aıtylǵan pikirler álem jurtshylyǵynyń nazaryna iligedi», - dedi óz sózinde sýretshi.
Birikken Koroldiktiń Qaýymdar palatasy ǵımaratynda jáne Koroldik avtomobılder klýbynda ótken kórmelerge brıtanııalyq depýtattar, Qazaqstan men Ulybrıtanııa dıplomatııalyq korpýsynyń, buqaralyq aqparat quraldarynyń ókilderi qatysty. Onda «ıAdrolyq qarýsyzdaný úshin kampanııa» uıymynyń bas hatshysy Keıt Hadson Qazaqstannyń ıadrolyq qarýǵa tyıym salý týraly shartty ratıfıkatsııalaýyn uly jetistik dep baǵalady.
«Bul bastama qarýsyzdaný qozǵalysyna úlken serpilis ákeldi», dedi ol sózinde.
Al Ulybrıtanııa Parlamenti Lordtar palatasynyń múshesi jáne «Parlamentarııler ıadrolyq qarýdy taratpaý jáne joıý úshin» uıymynyń teń tóraǵasy Baronessa Sıýzan Mıller ıadrolyq qarýdy synaýdyń qaýip-qateri men saldaryn álem jurtshylyǵyna jetkizýdegi Qazaqstannyń rólin aıryqsha atap ótti. Ol ásirese, Káripbek Kúıikovtyń jeke basynyń taǵdyry men ólsheýsiz eńbegin erekshe atap ótti. Ulybrıtanııa Parlamenti Qaýymdar palatasynyń depýtaty Bob Stıýart bolsa, Káripbek Kúıikovtyń aýyrtpashylyqqa tótep berip, ıadrolyq qarýǵa tolyq tyıym salý ıdeıasyn nasıhattap júrgendigin úlken erlik, dep baǵalady.
Sýretshiniń shyǵarmashylyq sapary Shotlandııanyń astanasy Edınbýrgte de jalǵasty. Káripbek Kúıikov jergilikti Parlamentte sóz sóılep, álemdi beıbitshilikke úndedi. Shotlandııanyń birinshi mınıstriniń orynbasary jáne bilim mınıstri Djon Sýınnmen kezdesti. Sondaı-aq ol Manchesterde de jeke kórmesin ótkizip, Lord-qala meri Abıd Latıf Chohanmen dıdarlasty.
