Qazaqstandyq súńgýirler halyqaralyq qutqarý operatsııalaryna qatysýǵa daıyn

PRIOZERSK. QazAqparat - Qaraǵandy oblysynyń Prıozersk qalasynda súńgýir-qutqarýshylardyń alǵashqy halyqaralyq oqý-ádistemelik jıyny aıaqtaldy. Trenıng Qazaqstan TJM qyzmetkerlerin І-ІІ mamandandyrý tobyna daıarlaý baǵdarlamasy aıasynda ótti. Oǵan QR jedel-qutqarý jasaǵynan 35 qutqarýshy qatysty, dep habarlaıdy QazAqparat tilshisi.

Kýrs sertıfıkaty halyqaralyq qutqarý operatsııalaryna qatysýǵa ruqsat beredi.

Oqý-jattyǵýdyń jabylý rásiminde Tótenshe jaǵdaılar mınıstri ıÝrıı Ilın is-sharaǵa onlaın rejımde qosyla otyryp, tabıǵı jáne tehnogendik TJ sanynyń turaqty ósýi jaǵdaıynda olardy joıý mindetin tabysty oryndaýdyń kepili - kásibı sheberliktiń joǵary deńgeıi ekenin atap ótti.

Sondaı-aq, Qaraǵandy oblysynyń ákimdigine TJ jónindegi óńirlik departamentti materıaldyq-tehnıkalyq jaraqtandyrýǵa jáne qaıta jaraqtandyrýǵa jan-jaqty kómek kórsetkeni úshin alǵys aıtty.

Negizinde súńgýirlerdi oqytqan qutqarý stantsııasynyń Qazaqstan aýmaǵynda balamasy joq.

Zamanaýı jabdyqtar apattyq-qutqarý jumysynyń barlyq túrlerin tolyq kólemde júrgizýge múmkindik beredi.

Esterińizge sala keteıik, oqý-jattyǵý 24 mamyr men 5 maýsym aralyǵynda halyqaralyq azamattyq qorǵanys uıymynyń jáne tótenshe jaǵdaılar ortalyǵynyń qoldaýymen ótti.

10 kún boıy Qazaqstan, Reseı jáne Qyrǵyzstan TJM nusqaýshy-mamandary tájirıbelerimen bólisti, kásibı máselelerdi talqylady jáne sheberlik shyńdady.

Trenıng halyqaralyq qoǵamdastyqtyń súńgýirlerin daıarlaý standarttaryna sáıkes keledi.

Jattyǵý aıaqtalǵannan keıin qatysýshylar halyqaralyq azamattyq qorǵanys uıymynyń sertıfıkatyn aldy.

Bul olarǵa halyqaralyq qutqarý operatsııalaryna qatysýǵa múmkindik beredi.