Qazaqstandyq sý doby sheberleri Álemdik lıga týrlaryna qatysady
ALMATY. 4 mamyr. QazAqparat /Erlik Erjanuly/ - Qazaqstandyq sý doby sheberleri búgin Oklende qalasynda bolatyn Álemdik lıganyń 1-týryna qatysý úshin Jańa Zelandııaǵa attanady.
Bul jóninde ulttyq quramanyń bas bapkeri Sergeı Drozdov búgin Almatyda ótken baspasóz máslıhatynda aıtty.
«Oǵan Avstralııa, Japonııa, Jańa Zelandııa, Qazaqstan jáne Qytaı quramalary qatysady. Avstralııanyń Sıdneı qalasynda bolatyn 2-týrdyń qorytyndysy boıynsha úzdik 2 komanda Álemdik lıganyń sýper-fınalyna shyǵady. Aldymyzdaǵy basty maqsatymyz - halyqaralyq kezdesýlerden tájirıbe jınap, London Olımpıadasynyń joldamasyn ıelený», - deıdi S. Drozdov. Odan keıin qazaqstandyqtar 16 shilde men 2 tamyz aralyǵynda Qytaıdyń Shanhaı qalasynda ótetin Álem chempıonatynda baq synamaq. Onda Sergeı Drozdovtyń tálimgerleri Vengrııa, Chernogorııa jáne Ispanııa quramalarymen bir topta synǵa túspek. Onda óz tobynda alǵashqy úshtikke engender negizgi synda 1-12 orynǵa, al 4-oryn alǵandar 13-16 orynǵa talasady. Bul dúbirli dodadan keıin 2012 jyldyń qańtarynda Japonııanyń Tokıo qalasynda Azııa chempıonaty ótedi dep josparlanýda. Jalpy sońǵy Álem chempıonatynda qazaqstandyq sý doby sheberleri 16-oryn alsa, Azııa oıyndarynda jeńimpaz atanǵan edi.
