Qazaqstandyq stýdentti soqqyǵa jyqqan amerıkandyq basketbolshy túrmege qamaldy
ASTANA. 24 qańtar. QazAqparat - Provıdens qalasynyń soty (Rod-Aılend shtaty ) 22 jastaǵy amerıkandyq Djeıms Stılldi (James Still) óziniń kýrstasy - qazaqstandyq stýdent Erkin Ábdirahmanovty ólim aýzyna deıin sabap, soqqyǵa jyqqany úshin tórt jylǵa sottady jáne 11 jylǵa synaq merzimin taǵaıyndady, dep habarlady "Ekspress-K" gazeti Providence Journal basylymyna silteme jasaı otyryp. Úkim seısenbi kúni, 22 qańtarda shyǵaryldy.
Jergilikti komandanyń basketbolshysy jáne onyń joldasy Djonnı Leısı 2010 jyldyń sáýir aıynda otandasymyzǵa shabýyl jasap, onyń jaq súıegin 16 jerden syndyrǵan. Dárigerler Erkinge birneshe plastıkalyq ota jasaýǵa májbúr bolǵan.
Tekserý amaldarynan belgili bolǵandaı, oqıǵa oryn alǵan kúni sportshylar ýnıversıtet aýmaǵynda serýendep, ishimdikke sylqııa toıǵan. Olardyń biri jolda kezdesken kez-kelgen jolaýshyny uryp soǵýdy uıǵarady. Ókinishke qaraı olarǵa kezdesken birinshi jábirlenýshi qazaqstandyq stýdent bolyp shyqty.
Jergilikti BAQ habarlaǵandaı, eki atlet sheteldikti sebepsiz soqqyǵa jyqqany úshin 20 jylǵa túrmege toǵytylýlary ábden múmkin edi. Alaıda amerıkandyq Femıda bul rette olarǵa «jumsaqtyq» tanytty. Buǵan deıin qazaqstandyq stýdentke shabýyl jasaǵan ekinshi amerıkandyq 3 jylǵa bas bostandyǵynan jáne 12 jyl synaý merzimine tartylý jazasyna kesilgen bolatyn.
