Qazaqstandyq stýdentterge qatysty AQSh sotynyń ádil sheshimin kútemiz - R.Joshybaev
ASTANA. QazAqparat - Bostondaǵy lańkestik áreketke qatysty aıyp taǵylǵan qazaqstandyq stýdentter Azamat Tájaıaqov pen Dıas Qadyrbaevtyń isi boıynsha sot ádil sheshim shyǵaratyndyǵyna úmit artamyz.
Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Syrtqy ister mınıstriniń birinshi orynbasary Rápil Joshybaev osylaı dedi.
«Árıne, Syrtqy ister mınıstrligi bul úderisti jiti qadaǵalap otyr. Biz bul otbasylarǵa vıza alýǵa kómektestik. Bizdiń kez kelgen azamat kómek suraǵanda SІM shuǵyl áreket jasaıdy. Al protsess óte qıyn, advokattar jumys isteýde. Bizdiń Elshilik arqyly nota da, túrli hattar da, ótinish te jiberildi. Іs baqylaýda tur. Biraq, ár eldiń óz zańy bar. Biz osynaý kúrdeli iske ádil sheshim shyǵýyn kútemiz», - dedi R.Joshybaev.
Eske sala keteıik, 2013 jyldyń 15 sáýirinde Boston marafonynda eki jarylys oryn alyp, saldarynan 3 adam ajal qushty, 200-ge jýyǵy japa shekti. Keıin polıtsııa lańkesti jasaǵan eki kúdiktiniń izine shyǵyp, olar AQSh-ta zańdy túrde turyp jatqan Soltústik Kavkazdyń týmasy aǵaly-inili Tamerlan men Djohar Tsarnaevtar bolyp shyqty. Tártip saqshylarymen qaqtyǵys barysynda T. Tsarnaev qaza boldy. Al 19 jastaǵy D. Tsarnaev kóp uzamaı qolǵa tústi. Eger onyń kinási dáleldense, ol ómir boıy abaqtyǵa toǵytylady nemese ólim jazasyna kesiledi.
Osy lańkestik is boıynsha Tsarnaevtyń úsh dosy qazaqstandyq Dıas Qadyrbaev pen Azamat Tájaıaqov jáne amerıkandyq Robel Fılıpposke Boston marafonynyń máresinde bolǵan jarylysqa qatysty isti tergeýge kedergi keltirdi degen aıyp taǵyldy.
Qazaqstandyq stýdentterdiń kinási anyqtalatyn bolsa, onda olar tergeýge kedergi keltirgenderi úshin 20 jylǵa jáne sóz baılasqandary úshin 5 jylǵa bas bostandyqtarynan aıyrylýy, sonymen qatar 250 myń dollar aıyppul tólep, 5 jylǵa deıin quqyq qorǵaý organdarynyń ashyq qadaǵalaýynda bolýy múmkin.
