Qazaqstandyq stýdentter jarys avtomobılin qurastyrdy
«Formýla stýdent» halyqaralyq bilim berý jobasyn SAE (Automotive Engineers Society, avtomobıl ınjenerleri qaýymdastyǵy) 1998 jyly bastaǵan. Bul – ınjenerlik jáne avtosport salalary boıynsha ótkiziletin stýdenttik joba. Stýdentter jarysqa qatysý úshin ózderiniń kólikterin qurastyrady.
«Biz – Ortalyq Azııa boıynsha «Formýla stýdent» jarysyna qatysqan alǵashqy komandamyz. Osy ýaqytqa deıin 2014 jyldan bastap Qazaqstan bul jarysqa qatysýǵa tyrysty, biraq alǵashqy bolyp Sýleıman Demırel ýnıversıtetiniń komandasy top jardy. Jarys kóligin qurastyrýǵa jáne óndirisine 4 aı ýaqyt ketti, óıtkeni elimizde «Formýla stýdent» jarysy boıynsha qandaı da bir baılanys, baza bolmaǵandyqtan, keıbir baǵyttar boıynsha ózimiz alǵashqy bolýymyz kerek boldy. Biraq Tolıattıdegi oqýdan kelgende jeltoqsan aıynan bastap qalyptasqan bilim bazasyn ashyp, ony kelesi qatysatyn stýdentterge úıretýdi josparlap otyrmyz», – dedi komanda kapıtany Elnur Ótebaı.
Onyń aıtýynsha, jarys aldynda ár júrgizýshi medıtsınalyq tekserýden jáne nusqaýlyqtan ótedi. Júrgizýshiler kóliktiń deńgeıine qaramastan sońǵy tehnıkamen jabdyqtalǵan, olardyń kamýflıajy janbaıdy jáne jaraqattan qutqarady, óıtkeni olar FIA-men retteledi. Bolıd jyl saıyn jańartylatyn jobanyń tehnıkalyq reglamentine sáıkes jasalýy kerek. Jeńiske jetý úshin komanda qatysýshylary tek konstrýktorlyq jáne tehnologııalyq mindetterdi ǵana emes, sonymen qatar kadrlyq, qarjylyq máselelerdi de sheshýi kerek.
Injenerlik jáne jaratylystaný ǵylymdary fakýltetiniń stýdentteri «Formýla stýdent» mektebinde oqýǵa bes grant utyp aldy. Qazaqstandyq komandada jarys kóligin ózge komandalardaǵydaı 60 emes, jeti adam qurastyrǵan.
«Bizdiń basty maqsatymyz – Qazaqstanda osy salany damytý. Elimizde alǵashqy bolyp Siemens NX ınjenerlik baǵdarlamasynda ekinshi bolıdti ázirleýdi bastaımyz. Bul baǵdarlamada álem boıynsha ınjenerlik salanyń kóshbasshylary ushaqtar, mashınalar men qozǵaltqyshtar jasaıdy. Qazirgi tańda atalǵan kompanııa ókilderimen kelissózder júrgizdik, endi bul sheshimdi ýnıversıtetke jetkizgimiz keledi. Josparlarymyzben bóliser bolsaq, jaqynda ınjenerlik 3D modeldeý baǵyty boıynsha SDU ýnıversıtetinde kem degende bir trek ashýdy josparlap otyrmyz. 10 kúnnen keıin múldem basqa joǵary deńgeıdegi ekinshi bolıdti ázirleý bastalady, bul úshin bizge 17 mln teńge qajet», – dep atap ótti komanda kapıtany Elnur Ótebaı.
