Qazaqstandyq stýdentter Túrkııada ótken amerıkandyq fýtbol dodasyna qatysty
ASTANA. QazAqparat - Túrkııanyń bas qalasy Ankarada Qazaqstan menedjment, ekonomıka jáne boljaý ınstıtýty (QMEBI) jáne túrik «Hadjettepe» ýnıversıteti komandalary arasynda dostyq jarys ótti, dep habarlaıdy Túrkııadaǵy Qazaqstan elshiliginiń baspasóz qyzmetinen.
«QMEBI tıtandary» komandasynyń qarsylas-dostarymen kezdesýleri Ortalyq Azııa, Eýropa jáne basqa da óńirleriniń ár túrli elderinde dástúrli uıymdastyrylyp turady. Bul joly dostyq kezdesý Túrkııada ótti. «Tıtandarǵa» qarsy oıynda túrik tarapynyń namysyn túrik «Hadjettepe» ýnıversıtetiniń komandasy qorǵaýǵa shyqty.
Oıynnyń birinshi aınalymynda eki komanda da óz paıdasyna birde-bir upaı ala almady. Esep tek oıynnyń ekinshi jartysynda ashyldy. Nátıjesinde jarys 6:8 esebimen túrik komandasynyń paıdasyna aıaqtaldy.
Qazaqstannyń amerıkandyq fýtbolynda osyndaı túrli dostyq dodalar birtindep-birtindep jankúıerler qataryn ósire otyryp, sımvolıkalyq oqıǵalar retinde qala berýde.
Stadıon trıbýnalary túrik jankúıerlermen qosa, qazaqstandyqtarǵa da toly boldy. Jankúıerler qataryn Qazaqstannyń Túrkııadaǵy Elshiliginiń dıplomattary men Túrkııada oqyp júrgen Qazaqstannyń stýdent-azamattary da tolyqtyrdy.
Eki baýyrlas el ýnıversıtetteri komandalarynyń dostyq kezdesýi eki eldiń arasyndaǵy mádenı-gýmanıtarlyq jáne sporttyq baılanystarynyń damýyna naqty úles qosty. Bul kezdesý eki el ýnıversıtetteri arasyndaǵy baılanystarynyń deńgeıin de kórsetti.
«QMEBI tıtandary» komandasy 2003 jyly QMEBI ýnıversıtetiniń bazasynda 1-shi kýrs stýdenti Petr Dzıýbanyń usynysymen qurylǵan bolatyn. Kerekti jabdyqtar men kıim-keshekter, forma, oıyn alańy jáne t.b. ýnıversıtet tarapynan berildi.
