Qazaqstandyq stýdentter Túrkııa qonaqúılerinde tájirıbeden ótip, eńbekaqy alady

ASTANA. QazAqparat – Túrkistandaǵy Halyqaralyq týrızm jáne meımandostyq ýnıversıtetiniń (IUTH) stýdentteri Antalııanyń jetekshi qonaqúılerinde tájirıbeden óte alady. Bul rette stýdentter atqarǵan jumystary úshin eńbekaqy alady, dep habarlaıdy QazAqparat Mádenıet jáne sport mınıstrligine silteme jasap.

Bıyl ýnıversıtet Túrkııaǵa 60 stýdent jiberýdi josparlap otyr. Bolashaqta praktıkanttar sany 300 adamǵa deıin ulǵaımaq.

Halyqaralyq týrızm jáne meımandostyq ýnıversıteti sheteldegi tájirıbeden basqa óz stýdentteri men oqytýshy-professorlar quramy úshin túriktiń úsh JOO-symen akademııalyq utqyrlyq baǵdarlamasyn iske qosady.

Kelisimderge IUTH rektory Aıdos Sákenovtiń Túrkııanyń joǵary oqý oryndarynyń rektorlarymen jáne eldiń qonaq úı bıznesiniń iri ókilderimen kezdesýi aıasynda qol jetkizildi.

«Túrkııa – týrızm salasyndaǵy álemniń jetekshi elderiniń biri. Sondyqtan, ondaǵy qonaqúılerde biliktilik arttyrý bizdiń stýdentterge eń qundy tájirıbe men kásibı ósý úshin mańyzdy bilim beredi. Bilikti kadrlardy daıarlaý – bizdiń basty maqsatymyz. Mundaı yntymaqtastyq otandyq týrızm ındýstrııasynyń damýyna eleýli úles qosady», - dedi ýnıversıtet rektory Aıdos Sákenov.