Qazaqstandyq stýdentter sporttyq baǵdarlamalaý boıynsha álem chempıonatynda TOP-20-ǵa kirdi
ASTANA. QazAqparat - Halyqaralyq aqparattyq tehnologııalar ýnıversıteti (HATÝ) sporttyq baǵdarlamalaý boıynsha ACM ICPC-2014 álem chempıonatynyń fınalynda 122 ýnıversıtettiń arasynda úzdik 20-nyń qataryna endi. Synǵa shamamen 90 eldiń úzdik IT-quramalary qatysty.
ACM ICPC nemese International Collegiate Programming Contest-2014 - sporttyq baǵdarlamalaý boıynsha komandalyq álem chempıonaty. Ol jyl saıyn Esepteý tehnıkasy qaýymdastyǵynyń (ACM) qoldaýymen uıymdastyrylady. Bıyl irikteý týrnırlerinde fınalǵa joldama alý úshin 2300 ýnıversıtettiń 30 myńnan astam stýdenti múmkindikterin kórsetti. Aqtyq synda olar 5 saǵattyń ishinde baǵdarlama túrindegi 10-12 kúrdeli matematıkalyq esepti shyǵarýy tıis.
Qazaqstandyq HATÝ quramasynyń qatarynda Mansur Qutybaev, Aleksandr Bolshakov jáne Vladımır Chjen bar. Aqtyq synda stýdentter 3 matematıkalyq eseptiń sheshimin taýypty. Aıta ketý kerek, sporttyq baǵdarlamalaý boıynsha ACM ICPC-2014 álem chempıonaty - jas baǵdarlamashylar arasyndaǵy mańyzdy komandalyq syndardyń biri. Talapty qazaqstandyq stýdentter Massachusetts Institute of Technology, University of Cambridge, Máskeý fızıko-tehnologııalyq ınstıtýty, Carnegie Mellon University jáne t.b jetekshi JOO artta qaldyrdy.
