Qazaqstandyq stýdentter Sıan qalasynyń jetim balalary úshin eki fýrgon syılyq jınady
«21 jeltoqsanda Sıan qalasyndaǵy barlyq ýnıversıtetterge habarlandyrý ildik. Internet jelisine múmkindigi shekteýli jetim balalarǵa oıynshyq, tátti, kıim, jeke gıgıena zattary, jemister, mektepke qajetti zattar qabyldaý bastalǵany týraly habarlama berildi. Aktsııaǵa 100-den astam adam qatysty. Olardyń ishinde Bangladesh, Qazaqstan, Qyrǵyzstan, Reseı jáne basqa elderden eriktileri bar. 4 kúnde eki fýrgon syılyq jınadyq», - dedi QazAqparatqa bergen suhbatynda KSAC Sıan bólimshesiniń tóraǵasy, Chanan ýnıversıtetiniń halyqaralyq qatynastar jáne saýda fakýltetiniń 4-shi kýrs stýdenti Janserik Tursynbek.
Onyń aıtýynsha Sıan q. balalar úıiniń tárbıelenýshilerine syılyqty 16 adam apardy. Onyń ekeýi Reseı men Ýkraınadan «MM studio» bı mektebiniń oqytýshylary, olar Kýnfý-Panda men jolbarys kostıýmimen óner kórsetti. Balalarǵa syılyqty Aıaz ata (Chanan ýnıversıtetiniń qazaqstandyq stýdenti Dmıtrıı Pozakshın) taratty.
«Biz tańdaǵan balalar úıi Sıan qalasyndaǵy úsh eń iri jetimder úıiniń biri. Onda 2-14 jastaǵy 700-dan astam bala tárbıelenedi. Olardyń basym bóligi - múmkindigi shekteýli balalar. Sıan bólimshesi Ánýar Asylhanǵa erekshe alǵys bildiredi. Ol kómekke alǵashqylardyń biri bolyp kelip, aqparatty tanystaryna, dostaryna taratty. Mobıldi WeChat kommýnıkatsııalyq júıede top qurdy. Oǵan 100-ge jýyq paıdalanýshy kirdi.
Eske salsaq, budan buryn bıyl Sıan bólimshesiniń belsendileri QHR Shensı provıntsııasy Sıanda «Baýyrsaq kúnin», sondaı-aq keń aýqymda Qazaqstan Táýelsizdiginiń 25 jyldyǵyn ótkizdi.
