Qazaqstandyq stýdentter «Sholpan» esimdi robot jasap shyǵardy
ASTANA. 17 sáýir. QazAqparat - «ASTEX-2013» halyqaralyq kórme-konferentsııasynda Halyqaralyq aqparattyq tehnologııalar ýnıversıtetiniń (HATÝ) stýdentteri «Sholpan» esimdi robotty tanystyrmaq.
Robot Almaty qalasynda qurastyryldy. Ol qozǵalyp, moınyn buryp, jymıyp sóıleıdi, sondaı-aq adamnyń kóńil kúıi men sóılegen sózin qaıtalaı alady.
Buǵan deıin otandyq robotty qurastyrý tek arman-qııaldan ári aspaıtyn. Alaıda búgingi tańda bolashaǵynan úlken úmit kúttiretin bilimdi jas qurastyrýshylardyń eńbeginiń nátıjesinde bul aqıqatqa aınaldy.
Infokommýnıkatsııalyq tehnologııa salasyndaǵy jastardyń eńbegi tek HATÝ-dyń emes, kúlli qazaq eliniń maqtanyshy. Máselen, byltyrǵy jyldyń tamyzynda stýdentter ózderi qurastyryp jasaǵan jumystaryn Gonkongta ótken «Robocon-2012» halyqaralyq baıqaýyna usyndy. Atap óterlik jáıt, Qazaqstan sońǵy on jylda mundaı saladaǵy sharalarǵa qatyspaǵan.
«Sholpan» jobasy avtorlarynyń aıtýynsha, bul robot arnaıy «ASTEX-2013» kórme-konferentsııasyna qatysý úshin jasalǵan. Sebebi, atalǵan shara barysynda tehnologııasy ozyq elderden tájirıbe jınap, óz jańalyqtaryn usynýǵa múmkindik almaq.
Infokommýnıkatsııalyq tehnologııany damytý qory kez kelgen tyń jobalardy qoldaýǵa daıyn.
Esterińizge sala ketsek, osy jyldyń 21-22 mamyrynda QR Kólik jáne kommýnıkatsııa mınıstrligi, «Zerde» ulttyq ınfokommýnıkatsııa holdıngi jáne ınfokommýnıkatsııa tehnologııany damytý qorynyń uıymdastyrýymen VI Astana ekonomıkalyq forýmynyń aıasynda «ASTEX - 2013» kórme-konferentsııasy ótpek (Astana Smart Technologies Exhibition Astanalyq ozyq tehnologııalar kórmesi).
