Qazaqstandyq stýdentter Gonkongte grantpen oqıdy - Saıasat Nurbek

ASTANA. QazAqparat - Ǵylym jáne joǵary bilim mınıstri Saıasat Nurbek Dúnıejúzilik bilim berý forýmy aıasynda Gonkongtiń Bilim mınıstri Christine Choi Yuk-lin-men kezdesip, osy máseleni talqylaǵanyn málimdedi, dep habarlaıdy QazAqparat.

«Gonkong ýnıversıtetteri álemdegi eń úzdik oqý oryndarynyń reıtıngine kiretini bárimizge málim. Búgin mınıstr Christine Choi Yuk-lin-men bizdiń mınıstrlik jáne Gonkongtiń Bilim mınıstrligi arasyndaǵy qol qoıylady dep josparlanǵan memorandýmda kórinis tabýy tıis máselelerdi talqyladyq. Sonyń biri - Gonkong tarapynyń bizdiń stýdentterge granttar bólýi. Qorytyndy qujatqa osy jyldyń jazynda qol qoıýdy josparlap otyrmyz.

Sonymen qatar Christine Choi Yuk-lin-ge qazaqstandyq ǵalymdardyń Gonkongte «Bolashaq» baǵdarlamasy sheńberinde (ásirese «DeepTech» baǵyty boıynsha zertteýler men ázirlemeler salasynda) taǵylymdamadan ótý máselesin qaraýdy usyndym», - dep jazdy Úkimet ókili.

Kezdesý sońynda mınıstrge Qazaqstannyń joǵary bilim berýdi ınternatsıonaldandyrý boıynsha júrgizilip jatqan jumystary, onyń ishinde jetekshi sheteldik joǵary oqý oryndarynyń fılıaldaryn ashý protsesi týraly aıtylǵan.

«Osy turǵyda áriptesimizden Gonkong joǵary oqý oryndarynyń basshylyǵyna bizdiń oqý oryndarynyń yntymaqtastyqty keńeıtýge daıyndyǵy, sondaı-aq qos dıplomdy baǵdarlamalardy engizý jáne qazaqstandyq joǵary oqý oryndarynda fılıaldar ashý týraly aqparatty jetkizýdi suradym», - deıdi Saıasat Nurbek.