Qazaqstandyq stýdent Shanhaıda ótken zııatkerlik baıqaýda jeńimpaz atandy

BEIJІŃ. QazAqparat - 16 qarasha kúni Beıjiń halyqaralyq bıznes jáne ekonomıka ýnıversıtetiniń (UIBE) qarjy fakýltetiniń 4-kýrs stýdenti qazaqstandyq Ánel Jarylqasynova «Shanhaı rýhy» uranymen ótken «HHІ ǵasyr kóshbasshysy» zııatkerlik baıqaýynda jeńiske jetti, dep habarlaıdy «QazAqparat» HAA Qytaıdaǵy menshikti tilshisi.

Dástúrli shara Shanhaı yntymaqtastyq uıymynyń shtab-páterinde ótti jáne oǵan uıymǵa múshe memleketterden kelgen, Beıjińniń joǵary oqý oryndarynda bilim alyp jatqan stýdentter qatysty.

«Baıqaý men úshin jańa múmkindikter men bilim-ǵylymnyń alańy boldy. Birneshe aı boıy júrgizilgen daıyndyq barysynda ShYU týraly mol derekterge qanyqtyq jáne oqýymdy aıaqtaǵan soń, osy uıymda jumys isteımin dep sheshtim. Baıqaý shyn máninde Shanhaı rýhyna laıyq dostyq sarynda ótti», - dedi A.Jarylqasynova QazAqparat tilshisine bergen suhbatyna.

Baıqaýdyń ekinshi jáne úshinshi oryndaryn Chjen Sı (Qytaı) jáne Aıdana Asqarova (Qazaqstan) ıelendi.

Eske sala ketsek, «HHІ ǵasyr kóshbasshysy» baıqaýy - «ShYU - ortaq úıimiz» keshendi baǵdarlamasynyń bir sharasy. Atalǵan baǵdarlama aıasynda «ShYU úlgisi» ınteraktıvti oıyny men stýdentter arasynda úzdik ǵylymı maqala baıqaýy ótti. Sondaı-aq, ShYU jastarǵa arnalǵan Ashyq esik kúnderin turaqty negizde uıymdastyrady.