Qazaqstandyq stýdent Qytaıda ómir boıyna túrmege jabyldy
ASTANA. 7 qarasha. QazAqparat - Qytaıdyń ońtústigindegi Gýanchjoý qalasynyń bir ýnıversıtetinde oqyp júrgen qazaqstandyq stýdent asa qaýipti esirtki zattaryn saqtaǵany úshin ómir boıy bas bostandyǵynan aıyryldy,
dep jazady «Megapolıs» gazeti.
Sóıte tura, basylym otandasymyzdyń ne aty-jónin, ne qashan jáne qalaı sottalǵanyn ashyp jazbaıdy. «Megapolıstiń» jazýynsha, tek byltyr ǵana Qytaıda esirtki úshin alty otandasymyz tutqyndalǵan. Sonymen qatar, 2011 jyly Qytaıdyń kóshi-qon polıtsııasy zań buzdy degen aıyppen Qazaqstannyń 6 stýdentin qaıtaryp jibergen, al bıyl ondaılardyń sany 3-eý bolǵan.
Qytaıdaǵy Qazaqstan elshiliginiń bilim jónindegi keńesshisi Murat Ismaǵambetovtiń aıtýynsha, bul eldegi bizdiń jastarymyzdyń oqý úlgerimi maqtanarlyqtaı emes. Tóbeles, mas kúıinde kólik aıdaý, zańsyz kásipkerlik sııaqty buzaqylyqtar olardyń úırenshikti isi deýge de bolady. Elshiliktegilerdiń aıtýynsha, byltyr jazda qazaqstandyq bir stýdent elektrmopedpen apatqa ushyrap, bir aı boıyes-tússiz jatqan. Onyń bassúıeginiń bir bóligin alyp tastap, mıyna eki ret ota jasaýǵa týra kelgen. Keıinnen Qazaqstanǵa qaıtarylǵan.
QHR Bilim mınıstrliginiń málimetinshe, ol elde qazir 8 myńnan astam qazaqstandyq oqyp júr. Konsýldyq tirkeýde 2900 adam bar. Dıplomattardyń aıtýynsha, munyń kesiri kóptegen qazaqstandyqtardyń ózderi týraly jalǵan nemese tolyq emes aqparat beretindiginen eken. Sonymen qatar, qazir shetelge oqýǵa jiberýmen týrıstik fırmalar da aınalysa bastady. Al olar aqshasyn alsa boldy, balanyń shetelde ózin qalaı ustaý kerektigin úıretip jatpaıdy deıdi mamandar.
Esterińizge sala keteıik, 2011 jyldyń kókteminde QR Syrtqy ister mınıstrligi Qytaıda esirtki tasymaldaǵany úshin ómir boıy bas bostandyǵynan aıyrylǵan 4 qazaqstandyq azamat týraly habarlaǵan bolatyn. Basynda BAQ olardy ólim jazasy kútip tur degen aqparat taratqan edi. Sońyn ala mınıstrlik munyń jalǵan ekendigin, azamattarymyzdyń ómir boıy bas bostandyǵynan aıyrylǵanyn, al ólim jazasy týraly sóz bolmaǵandyǵyn málim etti.
