Qazaqstandyq startapshylar bet-álpetti, dene qyzýyn avtomatty anyqtaıtyn joba oılap tapty
Clockster kompanııasynyń negizin qalaýshy jáne startap jetekshisi Erjan Rysqalıevtyń aıtýynsha, joba toby arnaıy qurylǵyǵa tapsyrys berdi, ony engizý servıske kelýshilerdiń temperatýrasyn jáne betperdeniń bolýyn anyqtaýǵa múmkindik beredi.
«Jańa sheshim uıym qyzmetkerleriniń dene qyzýyn, betperdeniń bar-joǵyn avtomatty túrde anyqtaıdy. Joǵary temperatýra bolǵan jaǵdaıda - derekter avtomatty túrde bazada saqtalady jáne jaýapty tulǵalarǵa elektrondy mekenjaı boıynsha habar jiberiledi. Sondaı-aq, dene qyzýy bar adamǵa ǵımaratqa ótýge tyıym salýǵa bolady, ondaǵy júıe qyzmetkerdi týrnıket arqyly ótkizbeıdi. Bul betperdelerge de qatysty», - deıdi E. Rysqalıev.
Qazirgi ýaqytta jańa júıe Astana Hub halyqaralyq tehnoparkinde ornatylǵan jáne basqa kompanııalardan 10-ǵa jýyq aldyn ala tapsyrys túsken.
«Bul servıs koronavırýstyq ınfektsııanyń taralý qaýpin azaıtý úshin qurylys sektory, aýrýhanalar, medıtsınalyq mekemeler, mektepter, ýnıversıtetter úshin óte qolaıly. Qazir kóptegen kompanııalarda kelýshilerdiń temperatýrasyn kúzetshiler tekserýde. Munda adam faktory kóp. Kúzetshi keı temperatýrany baıqamaýy múmkin jáne arzan qurylǵylar da jalpy bir gradýsqa deıin qatelik jiberedi. ıAǵnı, adamda 37 gradýs temperatýra kórsetkishi bolsa, ony 36 gradýs dep kórsetýi múmkin. Sonymen qatar, bizdiń qyzmetimizde kelýshilerdiń temperatýrasyn qolmen jazýdyń qajeti joq. Bizde barlyǵy tsıfrlanǵan jáne avtomattandyrylǵan, qonaqtardyń kirý/shyǵý jazbalaryn kórýge bolady», -deıdi startap jetekshisi.
Qazirgi ýaqytta startap Qazaqstanmen ǵana shektelmeı, Reseı, Ýkraına jáne Fılıppın naryǵyna da shyqty.
Aıta keteıik, Clockster – Astana Hub IT-startaptar halyqaralyq tehnoparkiniń qatysýshysy. Tehnoparktiń barlyq qatysýshylary salyq jeńildikterin alady. Bul jeńildikter qatysýshylardy KTS, QQS, taýar ımporttaýdaǵy QQS, roıaltı salyǵy, JTS jáne derbes rezıdentterdiń áleýmettik salyǵynan bosatady. Osyndaı memlekettik qoldaý sharasy ІT-kompanııalarǵa óz jobalaryn damytýǵa, únemdelgen qarajatty qaıta ınvestıtsııalaýǵa múmkindik beredi.
«Jeńildikterdiń arqasynda biz tek qyzmetkerler úshin zeınetaqy aýdarymdaryn tóleımiz. Bul – óte úlken kómek. Ótken jyly biz kóp qarajat únemdedik. Únemdegen qarajatty jobany damytýǵa ınvestıtsııaladyq, qyzmetkerlerdiń jalaqysyn kóterdik»,-dep qorytyndylady Erjan Rysqalıev.