Qazaqstandyq sportshylardyń qaısysy jomarttyǵymen kózge túsip júr?
ALMATY. QazAqparat - Jyl saıynǵy «Altyn júrek» qaıyrymdylyq qorynyń uıymdastyrýshylary osy syılyqtyń úmitkerleri týraly aıtyp berdi. Olardyń ishinde muqtaj jandarǵa kómegin aıamaǵan sport salasynyń mamandary da bar, dep habarlaıdy QazAqparat tilshisi.
Otandyq shoý-bıznes jáne sport juldyzdarynyń qymbat kólik minip, alshań basyp júrgenderiniń arasynda Atymtaı jomarttar joq emes.
Uıymdastyrýshylardyń aıtýynsha, ásirese sport salasynyń juldyzdary álemdik úrdisterden qalatyn emes.
«Qazaqstan sportynyń ańyzǵa aınalǵan tulǵasy Jaqsylyq Úshkempirov Myńbaev aýylynda jataqhana men balabaqsha qurylysynyń ınvestory boldy. Osynyń arqasynda 38 jas otbasy qonys toıyn toılap, 100 bala balabaqsha tabaldyryǵyn attady. Jańa bilim nysanynda qajetti kabınetterdiń barlyǵy bar. Sondaı-aq, Jaqsylyq Úshkempirov jergilikti balalarǵa arnap sport mektebin ashty. Qazir munda 300 bala sambo, dzıýdo, bokspen aınalysyp jatyr», - dedi syılyqtyń úılestirýshisi Gúlzat Saqova.
Batys Qazaqstan oblysynda jastar saraıynyń boks zalyna Olımpıada chempıony Danııar Eleýsinovtiń aty berildi. Olımpıadadaǵy jeńisine arnap BQO ákimi Altaı Kúlginov boksshy men onyń bapkeri - ákesine árqaısysyna 10 000 000 teńgeniń sertıfıkatyn tabystaǵan bolatyn.
Alaıda, sportshy bul qarjydan bas tartyp sal aýrýyna shaldyqqan balalarǵa arnalǵan «Báıterek» qoryna aýdardy.
Boksshy ózinen góri aqshaǵa balalar muqtaj dep sanaıdy.
2015 jyly selden japa shekken almatylyqtarǵa MMA aralas jekpe jek boıynsha eliniń namysyn qorǵap júrgen Qýat (Naıman) Hamıtov 1 mln teńge aýdarǵan bolatyn.
Bul týraly sportshy óziniń Instagram paraqshasynda jazǵan.
Aıta ketý kerek, Almatydaǵy selden 3 aýdannyń úıleri sýǵa ketken bolatyn. 1036 adam, 51 bala qaýipsiz jerge kóshirildi.
Qazaqstandyq balýan, grek-rım kúresinen KSRO sport sheberi Dáýlet Turlyhanov múmkindigi shekteýli búldirshinderdi sportqa tartý úshin túrli aktsııalar ótkizýge septigin tıgizip júr.
Sportshynyń muryndyq bolýymen Mańǵystaý oblystyq bodıbıldıng jáne fıtnes federatsııasy osyndaı sharalardy ótkizip turady.
Balalardy sporttyq formalarmen, qajetti quraldarmen, oqýlyqtarmen qamtamasyz etip keledi.
