Qazaqstandyq sportshylar taekvondodan álem chempıonatynda 6 medal jeńip aldy
ASTANA. QazAqparat – Kadetter arasynda taekvondodan álem chempıonatynyń ekinshi kúniniń qorytyndysy boıynsha qazaqstandyq sportshylar 2 altyn, 3 kúmis jáne 1 qola medal jeńip aldy, dep habarlaıdy QazAqparat.
Mádenıet jáne sport mınıstrliginiń málimetinshe, Bosnııa men Gertsegovınanyń astanasy Saraevo qalasynda kadetter arasynda taekvondodan álem chempıonaty ótip jatyr.
Ekinshi jarys kúniniń qorytyndysy boıynsha Qazaqstan komandasy 6 medal jeńip aldy: 2 altyn, 3 kúmis jáne 1 qola. Baýyrjan Isamedın (kategorııasy 164 sm-ge deıin) jáne Taısııa Borovıkova (164 sm) altyn medal aldy.
Kúmis júldegerler – Nurperzent Samatuly (160 sm), Nazerke Jańabergen (144 sm) jáne Ádilet Sheri (156 sm).
Qola júldeni Dinmuhamed Tolybaı (152 sm) jeńip aldy. Álem chempıonaty 31 tamyzda aıaqtalady.
«Jetkinshikterimizdi álemdik birinshilikte tabysty óner kórsetýimen quttyqtaımyn, bul – óte jaqsy nátıje. Sportshylardy daıarlaýmen aınalysqan jattyqtyrýshylardyń jumysyn erekshe atap ótkim keledi, aldaǵy jarys kúnderinde de elimizdiń quramasyna sáttilik tileımin», - dep atap ótti MSM Sport komıtetiniń tóraǵasy Erbol Myrzabosynov.
