Qazaqstandyq sportshylar Sıngapýrdegi Jastar Olımpıadalyq oıynynda birqatar jarystarǵa qatysty - tamyzdyń 22-sine sholý
ASTANA. Tamyzdyń 23-i. QazAqparat - Qazaqstandyq sportshylar jeksenbi kúni Sıngapýrdegi Jastar Olımpıadalyq oıynynda birqatar jarystarǵa qatysty, dep habarlady Týrızm jáne sport mınıstrligi Sport komıtetiniń Shtattyq ulttyq komandalar men sporttyq rezervter dırektsııasynyń baspasóz qyzmetinen.
Olımpıadalyq oıynda Qazaqstan tuńǵysh ret at sportyna qatysty. Sporttyń bul túrinde almatylyq Tımýr Patarov sátti óner kórsetip keledi. Jarystyń bul túriniń chempıony men júldegerleri erteń, tamyzdyń 24-inde anyqtalady.
Ókinishke oraı, shymkenttik Tımofeı Emelıanov kanoe sporty boıynsha medaldy ýysynan shyǵaryp aldy. Shırek fınalda rýmyndyq sportshymen jarysqan bizdiń atlet sońǵy aınalymda tolqyndy eńsere almaı, qaıyǵyn aýdaryp aldy. Endi bizdiń sportshy kanoemen taý slalomynda óner kórsetedi.
Al almatylyq Ershat Avhadıev pnevmatıkalyq myltyqpen atýda 15-shi oryndy qanaǵat tutty.
Qazaqstandyq ganbolshy qyzdar óz tobynda danııalyq sportshylarmen kezdesip, 15:40 esebimen jeńilip qaldy. Búgin, tamyzdyń 23-inde ótetin jartylaı fınaldyq kezdesýde bizdiń qyzdar Reseı quramasymen oınaıdy. Al jartylaı fınaldyq ekinshi kezdesýde Brazılııa men Danııa quramalary kezdesedi.
10 shaqyrymǵa aıańdap júrýde óner kórsetken shymkenttik Ivan Salıahov, qashyqtyqty jaqsy bastaǵanymen, márege jete almady. Al almatylyq bessaıysshy German Sobolev óz sportynda 24 qatysýshynyń ishinde 20-shy nátıje ǵana kórsete aldy.
Olımpıada oıyndarynyń uıymdastyrýshylary jarys jolynan shyǵyp qalǵan sportshylar úshin de kúresti jalǵastyrýdyń jańa ádisterin oılap taýyp otyr. Atap aıtqanda, búgin bizdiń boksshy Ádilet Raqyshev jasóspirimder arasyndaǵy eki dúrkin álem chempıony ırlandııalyq boksshymen 5 oryn úshin talasady. Dzıýdoshy Qaırat Aǵybaev ta besinshi oryn úshin kúsh synaspaq. Al estafetada Azııa komandasynyń atynan bizdiń jeńil atlet óner kórsetedi. Bul nátıjelerdiń barlyǵy Olımpıadanyń beıresmı esebiniń alǵashqy bestiginde ornalasqan «MIKS TIM» komandasynyń qorjynyna túsedi. Bul - jastar olımpıadasynyń jańalyǵy.
Aldaǵy ýaqytta eresekter arasynda ótetin halyqaralyq jarystarǵa josparly daıyndyǵyna kirisý úshin palýan qyz Zýlfııa Chınshanlo keshe Qazaqstanǵa oraldy. Qazaqstannyń sporttyq delegatsııasy tamyzdyń 28-inde elge tolyq quramda qaıtady.
