Qazaqstandyq sportshylar semserlesýden Azııa birinshiliginde úzdik úshtikke endi
NUR-SULTAN. QazAqparat - Ózbekstan astanasy Tashkentte semserlesýden jasóspirimder men kadetter arasyndaǵy Azııa birinshiligi aıaqtaldy, dep habarlaıdy QazAqparat Olympic.kz-ke silteme jasap.
Sary qurlyq chempıonatynda sportshylar úsh qarý túrinen synǵa tústi. Atap aıtar bolsaq, rapıra, sablıa jáne shpagamen semserlesýden Azııa úzdikteri anyqtaldy.
Qazaqstan komandasynyń sportshylary bir altyn, eki kúmis jáne úsh qola medal jeńip aldy. Shpagadan kadetter arasyndaǵy synda Bogdan Lýkın top jarsa, jasóspirimder arasyndaǵy synda Aleksandr Fedotov kúmiske qol jetkizdi.
Jalpy komandalyq esepte Gonkong pen Ózbekstandy alǵa jibergen Qazaqstan quramasy úshinshi orynǵa taban tiredi.
Aıta ketelik, týrnırge qurlyqtyń 20 memleketinen 300-den asa sportshy qatysty.
