Qazaqstandyq sportshylar kelesi Paralımpıadaǵa barmaı qalýy múmkin - Kolıadın
ASTANA. QazAqparat - Qazaqstan tarıhyndaǵy tuńǵysh Paralımpıada jeńimpazy Aleksandr Kolıadın qarjylandyrýdyń bolmaýynan sportshylar kelesi Paralımpıadaǵa bara almaı qalýy múmkin ekendigin aıtty. Bul jaıly ol «Qazsport» qonaqta» atty baǵdarlamanyń tikeleı efırinde aıtty, dep habarlaıdy QazAqparat «SPORTINFORM» SAA-ǵa silteme jasap.
Aleksandr Kolıadınniń aıtýynsha, reıtıngti upaılarǵa ıe bolyp, paralımpıadalyq lıtsenzııany alý úshin paralımpıadashylarda halyqaralyq saıystarǵa bara alatyndaı múmkindik joq.
«Kýboktyq upaılarǵa ıe bolý úshin halyqaralyq saıystarda baq synaý kerek. Al eger kýboktyq upaılar Álem Chempıonatyna jol ashatyn esik desek, sáıkesinshe ol arqyly Olımpıadaǵa da lıtsenzııa beriledi. Biraq, Álem kýbogy sekildi halyqaralyq saıystarǵa shyǵatyn múmkindigiń bolmasa, sen tıisti upaıdy ala almaısyń da, Chempıonatqa da, Olımpıadaǵa da bara almaısyń. Sizder, nelikten eki jyl úzilis boldy dep suradyńyz? Onyń bári meniń qolymda emes edi, qarjylandyrýdyń bolmaýynan. Halyqaralyq saıystarǵa bara almaǵandyqtan, úlken úzilister bolyp turady. Mine, qıyndyq qaıda jatyr. Bári de qarjylandyrýǵa baılanysty», - dedi «Qazsport-ta qonaqta» baǵdarlamasyna bergen suhbatynda Aleksandr Kolıadın.
Sonymen birge, chempıon paralımpıadalyq quramanyń rezervi turǵysynan da másele baryn jasyrmady. Qazirgi ýaqytta paralımpıadalyq medalǵa ıe bolǵandardyń ortasha jasy 45-50-de. Onyń aıtýynsha, Qazaqstanda jas paralımpıadashylarǵa sporttyq karera qurý úshin aıtarlyqtaı jaǵdaı jasalmaǵan. Sonymen qatar, Aleksandr elimizde paralımpıadashylardy daıyndaıtyn bapkerler az ekenin atap ótti.
«Jas jigitter tájirıbe alyp, olardy sportqa tartarlyq jaǵdaı jasalsa deımiz. Bizde aýystyratyn adam joq. Eger belgili bir paralımpıadashy jaraqat alyp qalsa, onyń ornyna aparatyn kelesi sportshy joq. Bireý jarystan shyǵyp qalady da, aqyry estafeta da joq bolyp shyǵady. Estafeta joq - demek, komanda da joq. Jas sportshylar barshylyq, biraq bizde olar jattyǵa alatyndaı ınfraqurylym bar dep aıta almaımyz. Bapkerlerimiz múlde joq. Paralımpıadashylar týraly aıtyp otyrmyn. Bul rette múlde bólek qurylym, basqa emotsıonaldyq jáne fızıkalyq múmkindikter kerek. Bul sportta kezinde qaıǵydan ótken adamdar júrgendikten, erekshe amal qajet», - deıdi chempıon.
Suhbatynyń sońynda «Paralımpıada-2018» jeńimpazy ókinishpen Qazaqstannyń paralımpıadalyq medaldardy baǵalaı qoımaıtynyn aıtty.
«Memleketke ótinish aıtar edim. Álbette, barlyq qoldaýǵa alǵysym sheksiz, biraq medalge degen qarym-qatynas ózgesheleý, ıaǵnı olımpıadalyq jáne paralımpıadalyq medaldarǵa kózqaras eki túrli. Máselen, shetelde paralımpıadalyq medaldarǵa zor qurmetpen qaraıdy. Al bizde kerisinshe, olımpıadalyq medalardy alǵa qoıady. Paralımpıadashylardan góri olımpıadashylarǵa basa nazar aýdarady», - deıdi Aleksandr Kolıadın.
Eske sala ketsek, qazaqstandyq shańǵyshy Aleksandr Kolıadın Phenchhandaǵy Paralımpıadada altyn medaldy jeńip alǵan bolatyn. 14 naýryzda ótken shańǵy jarysy Qazaqstan úshin jeńispen aıaqtalǵan. Klassıkalyq ádispen 1,5 shaqyrymdyq sprınterlik shańǵy jarysynda jarysqan sportshylar arasynda qazaqstandyq sportshy irikteý kezeńinde de, jartylaı fınalda da úzdik bolǵan edi. Aleksandr Kolıadın fınalda 4 mınýt 19,7 sekýnd nátıjesin kórsetip, aldyna jan salmady. Kúmis medal japonııalyq Ioshıhıro Nıttanyń enshisinde ketse, «qolaǵa» Kanada ókili Mark Arendz jáne Fınlıandııadan Iıkk Týomısto qol jetkizgen bolatyn.
