Qazaqstandyq sportshylar qazaq kúresinen ótken ІІ Álem kýbogynda bes júlde jeńip aldy
QARAǴANDY. 19 jeltoqsan. QazAqparat - 16-18 jeltoqsan kúnderi Qaraǵandydaǵy S.Sápıev atyndaǵy Boksty damytý ortalyǵynda ІІ Álem kýbogy, Azııanyń VIII chempıonaty jáne Qazaqstan Respýblıkasynyń qazaq kúresi boıynsha absolıýttik chempıonaty bolyp ótti.
Bul jarystarda Qazaqstan quramasynyń atynan eldiń barlyq aımaqtarynan kelgen 25 sportshy shyqty. Budan basqa, Úndistan, Reseı, Ulybrıtanııa, Latvııa, Lıtva, Armenııa, Tájikstan, Monǵolııa, Qytaı, Iran, Qyrǵyzstan, Belarýs, Polsha, Irak, Iemen, Palestına, Pákistan jáne Grekııadan komandalar keldi.
«Biz sizderdiń qazaq kúresinen Álem kýbogyna qatysýlaryńyzdy ulttyq sport dástúrlerimizge qurmet belgisi retinde baǵalaımyz. Biz úshin bul óte mańyzdy, óıtkeni Álem kýbogy Qazaqstanda, bizdiń qalamyzda alǵash ret ótkizilýde», - dedi Qaraǵandy oblysynyń ákimi Ábilǵazy Qusaıynov jarystyń saltanatty ashylýynda.
Oblys ákiminiń baspasóz qyzmetinen habarlaǵandaı, bul básekede Qazaqstan sportshylary bes júlde jeńip aldy, sonyń ishinde 3 altyn, 1 kúmis jáne 1 qola medaldar bar.
Altyn medaldarǵa qol jetkizgender arasynda Asylhan Barmenov (Qaraǵandy oblysy), Ardaq Quljanov (Taraz qalasy) jáne Qýanysh Muratov (Shyǵys Qazaqstan oblysy) bar. Kúmis jáne qola júldelerge jambyldyq Beıbit Ystybaev pen qaraǵandylyq Baýyrdan Ábilqas ıe boldy.
