Qazaqstandyq sportshy Jalǵas Jumaǵulov UFC-men kelisim jasady
NUR-SULTAN. QazAqparat – Qazaqstandyq aralas jekpe-jek sheberi Jalǵas Jumaǵulov MMA álemindegi eń bedeldi Ultimate Fighting Championship (UFC) promoýshenimen kelisim jasady, dep habarlaıdy QazAqparat Sports.kz-ke silteme jasap.
Bul týraly sportshynyń menedjeri Saıat Ábdirahmanov Instagram paraqshasynda jarııalady.
«Arlan MMA Pro komandasynyń balýany Jalǵas Jumaǵulov UFC-men kelisim jasady. Seni jáne osy jańalyqty asyǵa kútkenderdi quttyqtaımyz», - dep jazdy ol.
Aıta keteıik, bul UFC-men kelisim jasaǵan ekinshi qazaqstandyq sportshy. Budan buryn Shavkat Rahmonov promoýshenniń balýany atanǵan edi. Sondaı-aq, UFC-de reseılik etnıkalyq qazaq Damır Ismaǵulov óner kórsetedi. Jumaǵulovtyń qashan debıýt jasaıtyny keıinirek belgili bolady.
