Qazaqstandyq sportshy paýerlıftıngten Eýropa chempıony atandy
ASTANA. QazAqparat - Balqashtyq Alekseı Fedıaev paýerlıftıngten Eýropa chempıonatynda altyn medaldi ıelendi. Úshsaıystan ashyq chempıonat Frantsııanyń Výaron qalasynda ótti.
Oǵan álemniń 12 elinen myqty degen sportshylar qatysty. Paýerlıftıng úsh bazalyq jattyǵýdan turady - ol shtangamen júrelep otyrý, shtangany jatyp syǵymdap kóterý jáne tartý. Alekseı Fedıaev 110 keli salmaq dárejesinde syǵymdap kóterýde absolıýtti birinshilikti utty. 285 kelini kótergen Alekseı eki altyn medaldi enshilep, European Power Lifting Congress halyqaralyq federatsııasynyń nusqasy boıynsha 2014 jylǵy Eýropanyń absolıýtti chempıony atandy.
Alekseı Fedıaev sportqa mektepte oqyǵan kezinen den qoıǵan. Paýerlıftıngtiń bir artyqshylyǵy, onymen kez kelgen jasta aınalysýǵa bolady, deıdi 38 jastaǵy kúsh ıesi. Balqashtaǵy eń myqty adam «Qazaqmys Smeltıng» JShS zaýytynda balqytýshy bolyp isteıdi. Kúmisti quımaǵa aınaldyrady. Alekseı Fedıaev jumys pen sport jattyǵýlaryn birge ońaı alyp júretinin aıtady. Al «Qazaqmys» korporatsııasy bolsa, óz kezeginde sportshyǵa qajetti qoldaý kórsetip otyrady.
«Qazir meniń josparymda Avstrııanyń astanasy Venada ótetin álem birinshiliginiń aldynda jaqsy dem alyp, oǵan daıyndalý tur. Bizdiń jeńisten úmittenýge múmkindigimiz mol. Qazaqstandyq paýerlıft sportshylaryn Amerıka, Ýkraına, Reseı men Kanada sııaqty myqtylar qatarynan sanaıdy», - dep atap ótti Alekseı Fedıaev.
