Qazaqstandyq sportshy kanoedan jasóspirimder arasynda álem chempıony atandy
ORAL. QazAqparat – Batysqazaqstandyq sportshy Marııa Brovkova 18 jasqa deıingiler arasynda kanoedan Majarstannyń Seged qalasynda ótip jatqan álem chempıonatynda jeńimpaz atandy, dep habarlaıdy QazAqparat tilshisi.
Sportshynyń anasy ári jeke bapkeri Elena Brovkovanyń málim etkenindeı, Marııa búgin bir adamdyq kanoeda 1 myń metr qashyqtyqta top jarǵan.
«Qyzym buǵan deıin de kóptegen jarystarda júlde alyp júrdi. Jasóspirimder jáne 21, 22 jastaǵylar arasynda Qazaqstannyń birneshe dúrkin chempıony atandy. Bıyl naýryz aıynda Taılandta ótken Azııa birinshiliginde bir adamdyq kanoedan 500 metr qashyqtyqta kúmis júldege ıe boldy. Mine, endi Qazaqstan tarıhynda qyzdar arasynda alǵash ret álem chempıonatynyń altynyn alyp otyr. Bul – úlken tabys», dedi QazAqparat tilshisine Elena Brovkova.
