Qazaqstandyq sportshy German Gmaıner syılyǵynyń aqtyq kezeńine ótti
NUR-SULTAN. QazAqparat – Paraolımpıada sportshysy qazaqstandyq Álııa Raeva qoǵamnyń damýyna qosqan úlesi jáne jetistikteri úshin German Gmaıner syılyǵyn alýǵa daýys berýdiń aqtyq kezeńine ótti, dep habarlaıdy QazAqparat.
Jetim balalarǵa arnalǵan otbasylyq úlgidegi SOS-balalar aýyly ulttyq keńsesinen málim etkendeı, jeńimpaz daýys sanyna qaraı anyqtalady. Álııa qazir ekinshi orynda, biraq oǵan myna silteme arqyly daýys berip, alǵa shyǵýyna kómektesýge bolady.
«Álııa Almatydaǵy SOS-balalar aýylynda ósken. Oǵan dúnıege kelgen kezde balalar sal aýrýy dıagnozy qoıylǵan, osyǵan baılanysty ol jastaıynda birneshe aýyr ota jasatty. Dárigerler qyzdyń júre almaıtynyn aıtqan. Biraq, jaqyndarynyń qoldaýy men óziniń erik-jigeriniń arqasynda bul dıagnozdy jeńip shyqty. Álııa aıaqqa turyp, tolyqtaı bilim aldy, súıiktisin kezdestirip, otbasyn qurdy. Qazir jumys istep jatyr, alǵa jańa maqsattar qoıǵan. Ol qazir qoǵamdyq uıymda jumys isteýde, basqa adamdarǵa qol ushyn sozyp júr. Álııanyń bastan ótkergen oqıǵasy German Gmaıner syılyǵyn uıymdastyrýshylaryn tańǵaldardy. Ol álemniń túkpir-túkpirinen qatysqan 200 úmitkerdiń arasynan fınalǵa shyqty. Daýys berý 23 shildege deıin jalǵasady. Eger Álııa jeńiske jetse, bul syılyq tarıhyndaǵy Qazaqstan men TMD ókiliniń alǵashqy jeńisi bolmaq», - dedi qordan.
Aıta ketsek, German Gmaıner syılyǵy SOS balalar aýyldarynda ósip, qandaı da bir salada: sport, shyǵarmashylyq, kásibı qyzmette jetistikke qol jetkizgen adamdarǵa beriledi. Syılyq eki jylda bir ret eki jeńimpazǵa – eń kóp daýys jınaǵan er adamǵa jáne áıelge beriledi. SOS balalar aýyldary – jetim balalar men ata-anasynyń qamqorlyǵynsyz qalǵan balalardy uzaq merzim boıy tárbıeleıtin otbasylyq model.
Alǵashqy SOS balalar aýylyn 1949 jyly Imst qalasynda (Aýstrııa) aýstrııalyq pedagog German Gmaıner qurdy. Búginde SOS balalar aýyldary álemniń 136 elinde bar. Qazaqstanda SOS balalar aýyldary 1994 jyldan bastap Almaty, Nur-Sultan jáne Temirtaý qalalarynda jumys isteıdi.
Eske salsaq, German Gmaıner halyqaralyq syılyǵynyń fınalyna shyqqan Álııa Raeva otandastarynan qoldaý kútetindigi týraly habarlaǵan bolatynbyz.
