Qazaqstandyq sportshy Azııa chempıonatynda sporttyq gımnastıkadan qola júldeni ıelendi
ASTANA. QazAqparat - Qazaqstandyq sportshy Ázızbek Qudratollaev 31 shilde-2 tamyz aralyǵynda Japonııanyń Hırosıma qalasynda ótken Azııa chempıonatynda sporttyq gımnastıka jarysynda qola júldege qol jetkizdi.
Bul týraly QR Shtattyq ulttyq komandalar men sporttyq rezerv dırektsııasynyń baspasóz qyzmetinen habarlaıdy.
Jarysqa Azııanyń jeti elinen kelgen atletter qatysqan.
Gımnast Ázızbek Qudratollaev shyǵyrshyqtaǵy jattyǵýlardan aqtyq kezeńge shyǵyp, qurlyq birinshiliginiń qola júldesin jeńip aldy. Qazaqstan komandasy jalpykomandalyq 5-orynnan kórindi.
Ázızbek Qudratollaev - Shymkent qalasynyń týmasy, sporttyq gımnastıkadan halyqaralyq dárejedegi sport sheberi, 2015 jyly Koreıanyń Kvandjý qalasyndaǵy 28-shi Dúnıejúzilik Ýnıversıadanyń fınalısi, 2015 jylǵy álem kýbogy kezeńiniń (Lıýblıana qalasy, Slovenııa) kúmis júldegeri.
