Qazaqstandyq sportshy Álem chempıonatynan buıyrǵan jalǵyz medaldy bapkerine syılady
ATYRAÝ. QazAqparat - Horvatııa astanasy Zagrebte ótken kúres túrlerinen jasóspirimder arasyndaǵy álem chempıonatynyń qola júldegeri Bekzat Jalǵasovty sport janashyrlary men týǵan-týystary Atyraý áýejaıynan saltanatty túrde kútip aldy, dep habarlaıdy QazAqparat tilshisi.
Álemdik dodada erkin kúresten qazaq balýandary jalǵyz ǵana medaldi enshiledi. Bul júldeniń ıesi atyraýlyq Bekzat boldy.
«Aldymen, meniń esh qıyndyqsyz daıyndalyp, jarystarǵa barýyma múmkindik jasaǵan oblystyq sport basqarmasyna alǵysymdy bildiremin. Horvatııa eline kil myqty balýandar jınalǵan. Úzdik úshtikten kórinýdiń ózi qıynǵa soqty. Degenmen uzaq ýaqyt tynymsyz daıyndyqtyń jemisin kórdim», - dedi ol.
Aıta keterligi, Bekzat Jalǵasov álemdik dodada jeńip alǵan medalin bapkeri Aslan Jamanbaevtyń moınyna taqty. Osylaısha jattyqtyrýshysyna degen alǵysyn bildirdi.
Jas sportshy bul jetistigimen toqtap qalar emes. Ol endi Olımpıada oıyndaryna qatysyp, elimizdiń Ánuranyn shyrqatýdy maqsat etip otyr.
Horvatııanyń Zagreb qalasynda ótken kúres túrlerinen kadettter arasyndaǵy álem birinshiliginde qazaqstandyqtarǵa jalǵyz medal buıyrǵany týraly buǵan deıin jazǵan bolatynbyz.
Jarysty birinshi bolyp, erkin kúres balýandary ashty. Atalǵan kúres túrinen 65 keli salmaqta synǵa túsken Bekzat Jalǵasov aldymen makedonııalyq balýanmen kúresip, ony 10:0 esebimen jeńdi. Shırek fınalda ýkraınalyq balýandy 10:3 esebimen tize búktirdi. Ókinishke qaraı, fınalǵa shyǵar jolda Bekzat reseılik Inalbek Sherıevten 2:10 esebimen utylyp qaldy. Al qola medal úshin bolǵan beldesýde Grýzııadan kelgen balýannyń mysyn basyp (8:2) álem chempıonatynyń qola júldegeri atandy.
