Qazaqstandyq sport juldyzdary elorda stýdentterine dene shynyqtyrý sabaǵyn ótkizdi

NUR-SULTAN. QazAqparat - Ataqty qazaqstandyq sportshylar elordalyq kolledjderdiń biriniń stýdentterimen jattyǵý ótkizdi. Іs-shara Qazaqstan Táýelsizdiginiń 30 jyldyǵyna oraılastyrylǵan, dep habarlaıdy QazAqparat ákimdiktiń resmı saıtyna silteme jasap.

Sporttyq kezdesýdi №3 qalalyq emhananyń «Jas tolqyn» jastar densaýlyq ortalyǵy men Nur-Sultan qalasy ákimdiginiń kásiptik–tehnıkalyq kolledji birlesip uıymdastyrdy.

Shaqyrylǵan qonaqtar arasynda qazaqstandyq sportshylar odaǵynyń tóraǵasy Azamat Qarlyǵashev, erkin kúresten QR eńbek sińirgen sport sheberi Gýzel Manıýrova, aýyr atletıkadan QR eńbek sińirgen sport sheberi Svetlana Podobedova, kórkem gımnastıkadan 2011 jylǵy Azııa chempıony Anna Alıabeva, eki qol kúresi boıynsha Qazaqstan chempıony Aıtym Jaqypov boldy.

Onyń ishinde belgili sportshylar Dáýren Eleýsinov, Qanat Ábýtálipov jáne Sergeı Tsyrýlnıkov bar.

Jattyǵýdan keıin stýdentter 5 komandaǵa bólinip, «kóńildi starttarǵa» qatysty.

Tóreshiler qorytyndy shyǵaryp jatqanda, estafetaǵa qatysýshylar men kórermender arasynda bı jarysy ótti.

«Barshańyzdy kele jatqan merekemen quttyqtaımyn! Munda ózderiniń eńbekterimen jáne sheberligimen úlken bıikterge jetken sportshylar shaqyryldy. Olardan úlgi alyńyzdar! Denińiz saý jáne baqytty bolyńyzdar!»,- dedi №3 qalalyq emhananyń dırektory Sáýle Nurasheva.