Qazaqstandyq skrıpkashy Tramptyń jarlyǵynan soń AQSh-taǵy kontsertinen bas tartty
ASTANA. QazAqparat - Qazaqstandyq skrıpkashy Aısha Orazbaeva Tramptyń jarlyǵynan soń Chıkagoda ótkeli otyrǵan alǵashqy kontsertin ótkizbeıtin boldy, dep habarlaıdy QazAqparat Slippedisc-ke silteme jasap.
«Qazaqstandyq skrıpkashy Aısha Orazbaevanyń Chıkagoda belgilengen alǵashqy kontsertin tyńdaǵym kelip, qatty kútip júr edim. Biraq ol maǵan habarlasyp, ol kontsertti ótkizbeıtin bolǵandyǵyn aıtty. Bunyń aldynda ol pıanıst Djozef Hıýstonmen birge AQSh boıynsha týrne ótkizýdi josparlaǵan bolatyn», - deıdi chıkagolyq án synshysy ári kontsert uıymdastyrýshysy Pıter Margasak.
Skrıpkashy qyz óziniń kontsertinen bas tartýyna Tramptyń 27 qańtarda qabyldanǵan jarlyǵy sebep bolǵanyn jáne bul áreketke qarsylyq retinde jasalyp otyrǵanyn málim etken. Tramptyń atalmysh jarlyǵyna sáıkes, dıplomatııalyq vızalar men NATO jáne BUU jelisi arqyly alynǵan vızalardan bólek, Iran, Irak, Lıvııa, Somalı, Sýdan, Sırııa jáne Iemen azamattaryna AQSh aýmaǵyna kirýine tyıym salady. Jarlyqqa sáıkes, AQSh-qa bosqyndardyń kelýine 120 kúndik moratorıı jarııalandy. Sonymen qatar belgisiz merzimge sırııalyq bosqyndarǵa kelýge tyıym salyndy.
«Musylman elderiniń azamattaryna elge kirýge tyıym salynǵanyn oqyǵanda, sonymen qatar jeti bosqyn Djon F. Kennedı áýejaıyna ushqaly turǵan ushaqtan túsirilgenin, Grın kartasy bola tura Iran azamatyna AQSh-qa kelýge ruqsat berilmegenin oqyp, eger meniń pıanısim Iran azamaty bolǵanda maǵan da ushaqtan túsýge týra keler edi degen oılar keldi. Osynyń barlyǵyn «The Guardian» gazetinen oqı otyryp, men AQSh-qa bara almaıtynymdy uqtym», - dep jazǵan Aısha Orazbaeva Pıter Margaskaǵa joldaǵan hatynda.
Onyń sózinshe, bul sheshim oǵan ońaıǵa soqpaǵan.
«Nege mádenıet salasynda qyzmet etetin maǵan elge kirýge ruqsat beredi de, Sırııa azamattaryna tyıym salynady? Aıyrmashylyq nede? Men mádenı demalys beremin, al olar kómek surap keledi. Bul bir sumdyq qoı», - deıdi qazaqstandyq ónerpaz.
Óz kezeginde Pıter Margasak qazaqstandyqpen kelisetinin jetkizdi: «Men onyń sheshimin tolyqtaı qoldaımyn».
Almatylyq Aısha Orazbaeva London koroldik akademııasyn támamdaǵan. Onda ol «Bolashaq» baǵdarlamasymen bilim aldy. Ony klassıkalyq mýzykanyń jańa juldyzy dep baǵalaýda.
Aısha Orazbaevanyń kontsertteri Ispanııa, Italııa, Avstrııa, Ulybrıtanııa elderinde ótti.
