Qazaqstandyq skaýttar Donald Tramppen kezdesedi

Bul týraly «Uly dala skaýttary» qoǵamdyq uıymynyń prezıdenti Ildar Katenov málimdedi.

Álemdik skaýttar sleti 22 shilde men 2 tamyz aralyǵynda AQSh Batys Vırgınııa shtatynyń Beklı qalasynda S. Behtel atyndaǵy Ulttyq skaýt ortalyǵynda ótedi. Oǵan 160 memleketten 45 myń adam qatysady.

«Dúnıe júziniń skaýttary úshin mańyzdy bul jıynǵa Qazaqstannan 12 bala barady. Ol úshin 13-17 jas aralyǵyndaǵy balalarǵa irikteý júrgizildi. Basty talap - úmitkerlerdiń aǵylshyn tilin bilýi jáne skaýttyq qabiletteri boldy», - dedi Ildar Katenov Astanada Uly dala skaýttarynyń VIII konferentsııasynda.

Sondaı-aq, álemdik Djamborıge AQSh prezıdenti Donald Tramp jáne ózge de elderden tanymal saıası tulǵalar, qoǵam qaıratkerleri qonaq bolyp keledi.

«Slet festıvaldik formatta uıymdastyrylady, onda árbir delegatsııa óz elin, mádenıetin jáne salt-dástúrin tanystyrady. Osylaısha, álemniń túpkir-túpkirinen kelgen skaýtshylarǵa Qazaqstandy tanystyrý múmkindigine ıe boldyq», - deıdi I. Katenov.

Jalpy, skaýtıng - balalarǵa túrli oıyndar men qyzyqty sabaqtar arqyly orta mektepten de mol málimet, zor bilim men daǵdy bere alatyn bilim júıesi. Ony beıresmı bilim berý júıesi dep ataıdy. Skaýttar sol arqyly barlyq nárseni úırenedi. Jazda - tabıǵat aıasynda tirshilik etýdiń qyr-syryn úırense (otqa as pisiredi, qos qurady, palatkada uıyqtap, otyn jınaıdy, sýda júzedi, túrli komandyq oıyndar oınaıdy, aǵashqa órmeleıdi t.b.), qysta - týrızm boıynsha jarystarǵa, kvesterge qatysyp, túrli aktsııalar ótkizedi. Skaýt bolý úshin jas ereksheligi mańyzdy emes. Qysqasha aıtqanda, bul júıe balalarǵa jeke tulǵa retinde damýdyń jolyn aıqyndap bermek.

Búginde skaýttyq qozǵalysty QR Parlamenti, jergilikti basqarý organdary, QR bilim jáne ǵylym mınıstrligi, QR Tuńǵysh Prezıdentiniń kitaphanasy, mektepter men balalar shyǵarmashylyq úıleri, qoǵamdyq birlestikter, balalardy damytý jekemenshik ortalyqtary men jalpy bastamashyl ata-analar qoldap otyr.