Qazaqstandyq sınoptıkter tamyz aıynyń aýa raıy boljamyn aıtty
ASTANA. QazAqparat - Qazaqstandyq sınoptıkter tamyz aıynyń basynda aýa raıy ystyq bolady dep boljady, aıdyń sońyna qaraı aýa temperatýrasy tómendep, sýyq bolady dep kútilýde, dep habarlady Qazgıdromet.
«Atyraý, Mańǵystaý, Qyzylorda, Ońtústik Qazaqstan, Jambyl, Almaty, Batys Qazaqstan, Aqtóbe oblystarynyń jáne Qaraǵandy oblysynyń jeke aýdandarynda tamyz aıyndaǵy ortasha aýa temperatýrasy plıýs 23...30°S, qalǵan aýmaqtarda plıýs 15...22°S bolady», - delingen habarlamada.
Aıdaǵy ortasha jaýyn-shashyn mólsheri Atyraý, Mańǵystaý, Batys Qazaqstan, Aqtóbe jáne Qyzylorda oblystarynyń basym aýmaǵynda normadan tómen; Soltústik Qazaqstan, Aqmola, Pavlodar, Shyǵys Qazaqstan, Almaty oblystarynda, Jambyl jáne Ońtústik Qazaqstan oblysynyń taýly aımaqtarynda normadan joǵary bolady, qalǵan aýmaqtarda normaǵa saı bolady.
«Aıdyń basynda batysta jáne respýblıkanyń shyǵys bóliginde ótkinshi jańbyr jaýyp, naızaǵaı oınaıdy, batys baǵyttaǵy jel 15-20 m/s-qa deıin kúsheıedi. Shyǵys Qazaqstan oblysynda burshaq jaýýy yqtımal. 4-6 tamyzda respýblıkanyń basym aýmaǵynda kúndiz aýa temperatýrasy kóteriledi: batysta 30...38, ońtústik-batystyń keı jerlerinde 41; soltústik-batysta, soltústikte, soltústik-shyǵysta jáne ortalyqta 28...38 gradysqa deıin; ońtústik pen ońtústik-shyǵysta 33...38 gradýsqa deıin ysıdy», - dep habarlady sınoptıkter.
Alaıda jylylyq kópke sozylmaıdy. Birinshi onkúndiktiń sońynda aýa raıy qubylmaly bolyp, keıin aýa temperatýrasy tómendeıdi.
Boljam boıynsha tamyz aıyndaǵy ekinshi jáne úshinshi onkúndikteriniń birinshi jartysy jyly bolady dep kútilýde. Al ekinshi jáne úshinshi onkúndiktiń sońynda kún sýytyp, jaýyn-shashyn bolýy yqtımal. Soltústikte, shyǵysqa jáne ortalyqta túnde kún sýytyp, qatqaq bolýy múmkin.
