Qazaqstandyq shorttrekshiler Olımpıadanyń estafeta saıysyna joldama aldy
ASTANA. QazAqparat - Short-trekten Qazaqstan erler quramasy Phenchhandaǵy Olımpıada oıyndarynyń estafeta saıysyna joldama aldy, dep habarlaıdy «QazAqparat» tilshisi.
QR Ulttyq olımpıada komıtetinen málim etkendeı, Halyqaralyq konkıshiler odaǵynan osyndaı resmı ruqsat kelgen.
Buǵan deıin Qazaqstan quramasy 1500 metr qashyqtyqta taǵy bir shorttrekshiniń qatysýyna múmkindik alǵan bolatyn. Osylaısha, Ońtústik Koreıanyń Phenchhan qalasynda ótetin qysqy Olımpıada oıyndarynda Qazaqstannan jeti shorttrekshi (bes er, eki áıel adam) óner kórsetpekshi. Ulttyq qurama Kannyn qalasyndaǵy olımpıada qalashyǵyna 3 aqpan kúni jetedi.
Aıta keteıik, Sochı olımpıadasynda negizin batysqazaqstandyqtar quraǵan Qazaqstan erler quramasy 5 myń metrlik estafetada fınalǵa shyǵyp, besinshi oryndy ıelengen bolatyn. Endi osy kórsetkishti jaqsartýǵa Qazaqstannyń eńbek sińirgen jattyqtyrýshysy Mádiǵalı Qarsybekov bastaǵan mamandar baptaıtyn shorttrekshilerge taǵy bir múmkindik berilip otyr.
Olımpıadanyń ashylý saltanatynda Qazaqstan týyn batysqazaqstandyq shorttrekshi Abzal Ájiǵalıevtiń alyp shyǵatyny da belgili.
