Qazaqstandyq shorttrekshiler «Azııa balalary» oıyndarynda altyn jáne kúmis júlde aldy
ORAL. QazAqparat - Qazaqstandyq shorttrekshiler Reseıdegi Ońtústik Sahalınde ótip jatqan «Azııa balalary» І Halyqaralyq qysqy sport oıyndarynda altyn jáne kúmis júldeni jeńip aldy, dep habarlaıdy QazAqparat tilshisi.
Qazaqstandyq sportshylar estafetalyq synda úzdikter qatarynan kórindi.
Qyzdar arasynda Marııa Gorbýnova, Іńkár Nurlanova, Alına Ájiǵalıeva jáne Málıka Ermek 2 myń metrlik estafetada ekinshi orynǵa ıe boldy.
Sonymen qatar Aıbek Násen, Eseı Ibraev, Vadım Sadovnıkov, Damır Qurmanov jáne Valerıı Klımenko osyndaı estafetalyq synda altynnan alqa taqty.
Short-trekten BQO quramasynyń aǵa bapkeri, Qazaqstannyń eńbek sińirgen jattyqtyrýshysy Maksım Lozovoıdyń aıtýynsha, osylardyń ishinde Alına Ájiǵalıeva men Eseı Ibraev Oraldan bardy.
Eske sala keteıik, budan buryn qazaqstandyq jas bıatlonshy Vadım Kýralestiń altyn alǵanyn jazǵan bolatynbyz.
Búgin V.Kýrales 10 km qashyqtyqta máre syzyǵyn úshinshi bolyp kesti. Al taǵy bir qazaqstandyq Veronıka Shıshkına tuǵyrdan sekirýden chempıon atandy. Bıatlonshy Arına Sheshýkova ekinshi kúmis medalyna qol jetkizdi. 
