Qazaqstandyq short-trekshi álem chempıonatynda úzdik ondyqqa kirdi
ORAL. QazAqparat - Kanadanyń Monreal qalasynda short-trekten márege jetken álem chempıonatynda qazaqstandyq Denıs Nıkısha úzdik on sportshynyń qataryna endi, dep habarlaıdy QazAqparat tilshisi.
Qostanaı oblysynda týyp-ósken D.Nıkısha 1500 metr qashyqtyqta besinshi orynǵa ıe bolsa, 500 metrlik básekede jetinshi satyǵa taban tiredi. 1000 metrlik jarysta shırek fınaldan asa almaǵanymen, kópsaıys qorytyndysynda toǵyzynshy orynǵa kóterildi.
«Álem chempıonatyna Qazaqstannan Denıs Nıkısha ekeýmiz ǵana bardyq. Erlerden Nurbergen Jumaǵazıev pen qyzdardan Kım Iong A qatysýy kerek edi. Kanada elshiligi Máskeýde, vıza alý úshin on bir kúndeı ýaqyt qajet. Ekeýi vıza alyp úlgermedi. Soǵan qaramastan, Denıstiń kópsaıysta toǵyzynshy oryn alýy - jaqsy nátıje. Ótken jyly 21-oryndy qanaǵat tutqanbyz. Álem chempıonatyna saqadaı saı bolý úshin keminde bir apta buryn kelý kerek. Kanada, AQSh pen Qazaqstan arasyndaǵy ýaqyt aıyrmashylyǵy - 11 saǵat. Sondyqtan kúni buryn kelip, mundaǵy aýa raıyna beıimdelý de úlken ról atqarady», - dedi «QazAqparat» tilshisine short-trekten Qazaqstan ulttyq quramasynyń bas bapkeri Mádiǵalı Qarsybekov.
Sondaı-aq, ol alda erler men áıelder arasynda kópsaıystan Qazaqstan chempıonaty ótetindigin de aıtty.
«Osymen maýsym bitedi. Sodan keıin jańa qurama jasaqtap, kelesi Olımpıadaǵa daıyndyq jumystaryn bastaımyz», - dep túıdi bas bapker.
