Qazaqstandyq shekarashylar zańsyz ótkizilmek bolǵan 500 kg qus etin tárkiledi
ASTANA. QazAqparat - Ótken demalys kúnderi qazaqstandyq shekarashylar 15 túk halyq tutynatyn taýarlar, 60 gramm geroın jáne jarty tonna qus etin ótkizýge tyrysqandardyń jolyn kesti. Bul týraly QR UQK ShQ baspasóz qyzmetinen habarlady.
«Naqtyraq aıtar bolsaq, Qordaı shekara otrıadyna qarasty «Kaınar» zastavasynyń shekarashylary (Jambyl oblysy) halyq tutynatyn taýarlar salynǵan 15 túk júkti rezınaly qaıyqqa tıep kele jatqan 40 jastaǵy elimizdiń azamatyn ustady.
«Astana - Máskeý» baǵytyndaǵy poezǵa shekaralyq baqylaý jasaý kezinde Qostanaı shekara otrıadyna qarasty «Qaıraq» (temirjol) beketi baqylaýshylarynyń Vır esimdi ıti tambýrdyń mańaıyna jasyrylǵan túr-túsi, ıisi «geroınǵa» uqsaıtyn zat tapty, salmaǵy 60 gramm bolyp shyqty. Ustalǵan adamdar Qostanaı qalasynyń jelilik bólimshesine berildi.
«Lısakovsk - Chelıabınsk» baǵytyndaǵy avtobýsqa shekaralyq baqylaý jasaý kezinde Qostanaı shekara otrıadyna qarasty «Qaıraq» (avtomobıldik) beketiniń baqylaýshylary oryndyqtyń mańaıyna jasyrylǵan túr-túsi, ıisi marıhýanaǵa uqsaıtyn zat tapty, salmaǵy 200 gramdy qurady. Bul boıynsha ustalǵandar Qarabalyq aýdandyq ishki ister bólimine berildi.
Sondaı-aq, osy kúni qazaq-qyrǵyz shekarasynda eki ret qus etin zańsyz ótkizbek bolǵandardyń joly bolmady. Nátıjesinde, 500 kg qus eti shekarashylardyń qolyna tústi», - dep jazylǵan habarlamada.
Qazirgi ýaqytta atalǵan derek boıynsha anyqtaý jumystary júrgizilýde.
