Qazaqstandyq shekarashylar shekarany zańsyz kesip ótken 53 ózbekstandyqty ustady
ASTANA. Qyrkúıektiń 17-si. QazAqparat - Jetisaı otrıadynyń shekarashylary qyrkúıektiń 16-synda «Myrzakent» zastavasynyń ýchaskesinde shekarany zańsyz kesip ótken Ózbekstannyń 53 azamatyn ustady,
dep habarlaıdy QR Ulttyq qaýipsizdik komıtetiniń baspasóz qyzmetinen.
Ózbekstan azamattary Qazaqstan jaqqa jaıaý jetken. Olardyń barlyǵy ótkizý beketin aınalyp, shekaradan zańsyz ótken. Ustalǵandar Maqtaral aýdandyq ishki ister bóliminiń qyzmetkerlerine berildi.
Sol kúni qordaılyq shekarashylar «Betqaınar» zastavasynyń ýchaskesinde Qyrǵyzstannan 14 iri qara mal aıdap kele jatqan Qazaqstannyń eki azamatyn ustady. Al «Jasyl tóbe» zastavasynyń ýchaskesinde Qyrǵyzstannan 5 jylqy men 40 bas iri qara mal aıdap ótpek bolǵan Qazaqstan azamaty ustaldy. Qazir atalǵan faktiler boıynsha tekserýler júrýde.
Qazaqstan-reseı shekarasynda keshe «Jańa jol-avto» shekaradaǵy baqylaýshy petropavldyq bólimniń narıady Reseıden avtokólikpen kele jatqan Reseı jáne Qyrǵyzstan azamattaryn ustady. Tekserý kezinde olardan deklaratsııalanbaǵan aqsha - 8 427 AQSh dollary men 350 myń reseılik rýbl tabyldy. Fakti boıynsha tekserý júrgizilýde.
