Qazaqstandyq shekarashylar qus eti men shaıandardy zańsyz alyp ótpek bolǵandardy ustady
ASTANA. QazAqparat - Ótken táýlik ishinde qazaqstandyq shekarashylar júkterin kontrabandalyq jolmen shekara asyrmaq bolǵan qazaqstandyq eki azamatty ustady, dep habarlaıdy QR UQK ShQ baspasóz qyzmetinen.
Atap aıtqanda, «Qarasý-avto» baqylaý-ótkizý beketinde (qazaq-qyrǵyz shekarasy) 18 qarasha kúni saǵat 23.40 shamasynda 1989 jyly týylǵan Baqtııar esimdi Qazaqstan azamaty ustaldy. Onyń «Aýdı-100» kóligin qaraý kezinde júk salǵyshynan salmaǵy 50 keli bolatyn úırek eti tabyldy. Júrgizýshi oǵan qatysty ilestirme qujattaryn kórsete almady. Ustaý materıaldary Jambyl oblysynyń Qarasý kentindegi veterınarlyq qyzmetke berildi.
Sondaı-aq elimizdiń batysyndaǵy «Shyńǵyrlaý temirjol» baqylaý-ótkizý beketiniń (Qazaqstan-Reseı shekarasy) shekara narıady osy jyldyń 19 qarashasy kúni túngi 02.26 shamasynda №058 «Oral-Astana» baǵytyndaǵy jolaýshylar poıyzyna shekaralyq baqylaý júrgizdi. Baqylaý barysynda «Vera» esimdi 1963 jyly týylǵan Qazaqstan azamatshasynyń salmaǵy 30 keli bolatyn tiri shaıandardy jasyryn áketip bara jatqany anyqtaldy. Shaıandardyń aldyn ala eseptegendegi baǵasy 30 000 teńge bolyp shyqty. Sý jándikterin zańsyz ustaǵany úshin jolaýshy zań aldynda jaýap beretin bolady.
Ustaý materıaldary Batys Qazaqstan oblysy Shyńǵyrlaý aýdanynyń ishki ister bólimine berildi.
