Qazaqstandyq shekarashylar Kaspıı teńizinen 14,5 km brakonerlik aýdy alyp shyqty
ASTANA. QazAqparat - Ótken táýlik ishinde Qazaqstan Respýblıkasy UQK Shekara qyzmetiniń «Jaǵalý kúzeti» óńirlik basqarmasynyń teńiz shekarashylary Kaspıı teńizindegi memlekettik shekarany kúzetý barysynda 14500 metr brakonerlik aý, 10 000 metr kaladty (ilmekteri bar arqan) taýyp, olardy jınap aldy, sondaı-aq olardan 43 teńiz jándigin bosatty, dep habarlady vedomstvo baspasóz qyzmeti.
Atap aıtqanda, «Saqshy» kateriniń shekarashylary 14 jeltoqsan kúni 12 saǵat shamasynda Kaspıı teńiziniń betinen 10 000 metr kaladty jınap, odan 5000 dana ilmekti aldy.
Osy kúni 13:00-de «Atyraý» kateriniń shekarashylary teńiz betinen 500 metr aýdy jınap aldy.
Al shekara katerleriniń ishinde eń oljaly bolǵany «Jeńis» kateri boldy. Olar bir kún ishinde 14000 metr brakonerlik aýdy jınap, odan 37 bekire tuqymdas balyqty, 5 ıtbalyqty bosatty.
Barlyq derekter boıynsha quqyqqorǵaý organdary habarlandyryldy.
