Qazaqstandyq shekarashy nysana kózdeýden Máskeýdegi týrnırde 1-oryn aldy
ASTANA. QazAqparat - Qazaqstandyq shekarashylar nysana kózdeýden halyqaralyq týrnırde úzdik nátıje kórsetti, dep habarlady QR UQK Shekara qyzmeti.
Máskeýde Reseı Federatsııasynyń Federaldy qaýipsizdik qyzmeti (FQQ) Shekara akademııasynda TMD-ǵa múshe memleketterdiń shekara áskerin basqarýshy keńesiniń basshylyǵymen makarov tapanshasynan nysana kózdeýden halyqaralyq týrnır ótti.
Oǵan Qazaqstarn, Reseı, Tájikstan, Qyrǵyzstan, Túrikmenstan, Abhazııa, Mońǵolııa men Vetnamnan 8 komanda qatysty.
Qazaqstan Respýblıkasynyń Shekara qyzmetiniń komandasyn RF FQQ Shekara akademııasynyń tyńdaýshylary qurady: shtab basshysynyń orynbasary, «Soltústik» aımaqtyq basqarmasynyń 2034 áskerı bóliminiń áskerı daıyndyq bóliminiń basshysy, podpolkovnık A.Qajenov, «Ońtústik» aımaqtyq basqarmasynyń 2041 áskerı bólimi shtabynyń aǵa ofıtseri, maıor A.Baqytbekov, «Batys» aımaqtyq basqarmasy bóliminiń aǵa ofıtseri, maıor M.Kongýev, «BOhr» aımaqtyq basqarmasynyń 2201 áskerı bóliminiń bólim bastyǵy, kapıtan E.Samatov pen «BOhr» aımaqtyq basqarmasynyń 2016 áskerı bólimi shtabynyń aǵa ofıtseri, kapıtan E.Manarbek.
Týrnır qorytyndylary boıynsha, Qazaqstan Respýblıkasynyń UQK shekara qyzmetiniń ofıtserler komandasy 314 upaımen jalpykomandalyq esepte 2-oryn aldy. RF FQQ Shekara qyzmetiniń bastyǵy, general-leıtenant S.Poskrebetev qatysýshylarǵa dıplom men kýbok tabystady.
Jarystyń qorytyndysy boıynsha, Makarov tapanshasynan atý boıynsha jeke birinshilikte «Ońtústik» aımaqtyq basqarmasynyń 2041 áskerı bólimi shtabynyń aǵa ofıtseri, maıor A.Baqytbekov jeńiske jetti. Ofıtserdiń nátıjesi - 91 upaı.
Qazaqstandyq shekarashylar Halyqaralyq týrnır barysynda joǵary kásibı biliktilikterin kórsetip, TMD elderiniń arasynda QR UQK ShQ ımıdjiniń damýy men nyǵaıýyna úles qosty.
