Qazaqstandyq sheberler Italııada «Trýbadýr» operasyna kostıýmder daıyndady
GENÝıA. QazAqparat - Italııanyń Genýıa qalasyndaǵy Karlo Felıche teatrynda 2019-2020 jylǵa arnalǵan opera jáne balet maýsymyn «Trýbadýr» qoıylymy ashty, dep habarlaıdy QazAqparat.
Dál osy qoıylym 1991 jyly 18 qazanda restavratsııadan keıin qaıta ashylǵan Karlo Felıche teatrynyń alǵashqy maýsymyn ashqan bolatyn.
Genýıa jurtshylyǵy úshin «Trýbadýr» - jandanýdyń nyshany.
Tanymal Verdıana trılogııasyna (La Travıata, Rıgoletto, Trýbadýr) Qazaq ǵylymı-zertteý mádenıet ınstıtýty ótken jyly úzdik dep tanyǵan qazaqstandyq 50 sýretshiniń qataryna engen otandastarymyz da qatysýda.
«Bizdiń basty maqsatymyz áıgili lıbrettonyń opera rýhyn, atmosferasyn jetkizý boldy. Eń aldymen, kompozıtor Verdıdiń óz shyǵarmasynda aıtqysy kelgenin túısinip, pash etkimiz keldi. Qazan aıynda bizde Verdıdiń «Don Karlos» operasy boldy. Bul jumys osylaısha, «Trýbadýrǵa» jalǵasty. Sóıtip, bizde Verdıdiń operalyq kúıinen shyǵýǵa tipti ýaqyt ta bolmady», - dedi sahna dızaıneri jáne kostıýmder boıynsha sýrteshi Sofıa Tasmaǵambetova.
Sofııa úshin bul Italııadaǵy alǵashqy qoıylym jumysy. Sýretshi Genýıada bolǵanyna óte qýanyshty ekenin jasyrmaıdy. Ol daıyndyq protsesiniń kúrdeliligi rejısserge baılanysty ekenin, qoıylymǵa Verdıdiń barlyq derlik shyǵarmalarymen tanys Marına Bıankı qatysqandyqtan jumys isteý jeńil bolǵanyn aıtady.
«Teatrda arnaıy jabdyq – aınalatyn sheńber bar. Ústinde dekoratsııa qoıylǵan, bul dekoratsııa spektakl boıyna aınalady. Sahna ózgerisi kórermenniń kóz aldynda júzege asady. Bul, dál osy opera úshin óte mańyzdy. Óıtkeni kidirýge jol berilmeıdi. Ol úshin jaı mýzyka joq. Sol sebepti dál osyndaı tásildi tańdadyq», - dep óz qupııasymen bólisti sahna bezendirýshi, kostıýmder boıynsha sýretshi Pavel Dragýnov.
Sofıa Tasmaǵambetova men Pavel Dragýnov uzaq ýaqyttan beri ózderiniń jeke shyǵarmashylyq tandemin quryp, dekoratsııadan bastap kostıýmderge deıin spektaklderdiń tolyq sahnalyq dızaınyn jasaıdy. Pavel erler kostıýmderin ázirlese, Sofıa – áıelderdiń kıimin daıyndaıdy. Shyǵarmanyń mazmunymen tanysqannan keıin, stsenograftar eskızder, rekvızıt, býtaforııa, kostıýmder ázirleýge kirisedi. Ár keıipkerdiń sıpatyna qaraı aksessýarlaryn jeke-jeke táptishtep sýretin salyp, daıyndaıdy.
«Sahna óte erekshe boldy. Úılesimdi dekoratsııanyń aınalýy, barlyq qural-jabdyqtar men jaryqtyń ózgerýi, operanyń ózi, mýzyka – tipti keremet. Maǵan shynymen de qatty unady», - dedi qoıylymnan keıin kórermen Karlo Barbıerı.
Genýıadaǵy basty opera teatry Karlo Felıcheniń 2 myń oryndyq zalynda ıne shanshar jer bolmady.
Karlo-Felıche teatry - Italııadaǵy iri opera úıi, ol opera men balet spektaklderin de, aýqymdy kontsertterdi de qabyldaıdy. Ǵımarattyń alǵashqy tasy 1826 jyly naýryzda qalanǵan.
