Qazaqstandyq sharýalar egin alqabyn erikti túrde saqtandyra alady
Bul týraly QR Aýyl sharýashylyǵy vıtse-mınıstri Rústem Qurmanov málimdedi.
«2020 jyldyń 1 qańtarynan bastap jańa zań kúshine enedi jáne aýyl sharýashylyǵy taýarlaryn óndirýshilerge mindetti saqtandyrý qajet bolmaıdy. Olar óz eginin erikti túrde saqtandyrady jáne saqtandyrý kompanııasyn ózderi tańdaıdy. Ol úshin arnaıy saqtandyrý ónimderi ázirlenedi», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, ár óńirde túrli normatıvter men óteý protsentteri belgilenedi.
«Qazir «Egin salasyndaǵy mindetti saqtandyrý týraly» zań boıynsha, ortasha saqtandyrý tarıfi gektaryna 80-120 teńge aralyǵynda ózgerip otyrady. ıAǵnı, tabıǵı ózgeristen eginińiz shyqpasa, Soltústik Qazaqstanda gektaryna 3 400 teńge ǵana óndirip alasyz. Bul shyǵyndy esh óteı almaıdy, sebebi sharýa dán egý úshin eń kemi 20 myń teńge jumsaıdy», - dep túsindirdi Rústem Qurmanov.
Al erikti saqtandyrýda naryqqa sáıkes tarıf qurylady jáne saqtandyrý ótemi kóbirek tólenedi.
«Saqtandyrýdyń aldyn ala esebi boıynsha, soltústik óńirde bıdaı alqabynyń ár gektaryn 1200-1500 teńgege saqtandyrýǵa bolady. Munda egin joǵalyp, saqtandyrý jaǵdaıyn qoldaný kerek bolsa, sharýa ár gektary úshin 30 myń teńge ótemaqy ala alady», - dedi Rústem Qurmanov.