Qazaqstandyq shańǵyshy Italııada qola medal aldy
ASTANA. QazAqparat - Qazaqstan ulttyq quramasynyń múshesi, halyqaralyq dárejedegi sport sheberi Evgenıı Velıchko Italııanyń Santa-Katerına qalasynda ótken shańǵy jarysynda qola medaldy jeńip aldy, dep habarlaıdy «QazAqparat» HAA QR Shańǵy jarysy federatsııasyna silteme jasap.
Halyqaralyq shańǵy federatsııasy erler arasynda 15 km qashyqtyqta erkin ádispen jarys uıymdastyrdy. Oǵan Italııa, Frantsııa, Germanııa, Reseı, taǵy basqa da elderden 95 sportshy qatysty. Jarys qorytyndysy boıynsha, Evgenıı reseılik Denıs Spıtsovten 1 mınýtqa jýyq, ekinshi oryndy alǵan belarýstyq Sergeı Dalıdovıchten nebary 14 sekýndqa kesh keldi.
«Jarys qıyn boldy, qatysýshylardyń barlyǵy joǵary daıyndyqpen kelgen. Kúmis medal alýǵa birneshe sekýnd keshiktim. Keleside budan da joǵary jetistikterge jetý úshin eńbek etemin», - deıdi Evgenıı.
Eske sala ketsek, qazir shańǵy jarysynan Qazaqstannyń ulttyq qurama komandasy Eýropada júr. Sportshylar FIS-start (Italııa, Santa-Katerına) jáne Álem kýbogynyń ekinshi kezeńine (Norvegııa, Lıllehammer) qatysýda. Osy jarystar arqyly Qazaqstannyń Koreıada ótetin qysqy Olımpıada oıyndaryna qatysatyn komandasy jasaqtalady.
