Qazaqstandyq shańǵyshy Alekseı Poltoranın Avstrııada jarys jolyna shyqpady
ASTANA. QazAqparat - Nemis jýrnalısti Haıo Zeppelt Tvıtterinde Avstrııanyń Zeefelde qalasynda shańǵy jarysynan ótip jatqan álem chempıonatynda Qazaqstan, Avstrııa men Estonııa sportshylary antıdopıngtik erejelerdi buzdy degen kúdikke ilingenin jazdy, dep habarlaıdy QazAqparat tilshisi «SPORTINFORM» SAA-ǵa silteme jasap.
«ARD aqparaty boıynsha, kúdikke chempıonat ótip jatqan jarystyń ıeleri - avstrııalyqtar, sonymen birge Estonııa men Qazaqstan sportshylary ilingen. Qandaǵy dopıng pe? 15 shaqyrymdyq erler arasyndaǵy jarystyń dál aldynda qylmys ústinde bireý ustaldy degen kúdiktemin», - dep jazady Zeppelt.
Habarlanyp otyrǵandaı, avstrııalyq shańǵyshylar Domınık Baldaýf pen Maks Haýkeni qazirdiń ózinde polıtsııa ustaǵan. Olardan bólek, 15 shaqyrymdyq klassıkalyq jarys jolyna Qazaqstan quramasynyń kóshbasshysy Alekseı Poltoranın, sonymen birge estondyq Andreas Veerpalý men Karel Tammıarv shyqpaǵan. Jalpy, polıtsııa tórt elden 9 adamdy ustaǵan. Olardyń beseýi - sportshylar.
Eske sala ketsek, ótken jyldyń qarasha aıynda bir top qazaqstandyq bıatlonshy antıdopıngtik erejeni buzdy degen kúdikpen jarystan shettetilgen bolatyn. Olardyń ishinde Alekseı Poltoranınniń zaıyby - bıatlonshy Olga Poltoranına da bar edi.
