Qazaqstandyq shańǵyshy A.Slonova qysqy ýnıversıadada kúmis medal jeńip aldy
ASTANA. QazAqparat - Búgin Slovakııada ótip jatqan qysqy ýnıversıadada qazaqstandyq shańǵyshy Anastasııa Slonova 5 shaqyrymǵa klassıkalyq ádispen jarysýda kúmis medaldi enshiledi.
«Qazsport» telearnasynan tikeleı efırde kórsetkenindeı, kópke deıin alda turǵan A.Slonovadan reseılik, Omby qalasynan kelgen tájirıbeli shańǵyshy Oksana Ýsatova ǵana oza aldy. Qola júlde taǵy bir reseılik Lılııa Vasılevaǵa buıyrdy.
Sondaı-aq qazaqstandyqtar Anna Stoıan altynshy, Vıktorııa Lanchakovanyń toǵyzynshy oryndy ıelengenin aıta keteıik. Bul qazaq eli shańǵyshylarynyń estafetalyq jarysta da medal úshin talasatynyn kórsetedi.
Bul - Anastasııanyń osy ýnıversıadadaǵy ekinshi medali. Ol jarystyń alǵashqy kúni sprıntten altyn medaldi jeńip alǵan bolatyn. Qorjynynda qos altyn, bir kúmis júldesi bar Qazaqstan quramasy jalpykomandalyq esepte burynǵysha Reseıden keıin ekinshi orynda keledi.
