Qazaqstandyq shańǵyshy A.Poltoranın «Týr de Skı» kópkúndiginiń mass-start jarysynda top jardy
ASTANA. 2 qańtar. QazAqparat - Qazaqstandyq shańǵyshy Alekseı Poltoranın Shveıtsarııanyń Lentserhaıde eldi mekeninde ótip jatqan «Týr de Skı» kópkúndiginiń mass-start jarysynda jeńimpaz atandy, dep habarlaıdy vesti.kz.
Bul Poltoranınniń osy maýsymdaǵy alǵashqy jeńisi. Qazaqstandyq shańǵyshy 15 shaqyrym qashyqtyqty 34 mınýt 28,1 sekýndta júrip ótti.
Germanııalyq Hannes Dotsler 0,6 sekýndqa qalyp, máre syzyǵyn ekinshi bolyp kesti. Úzdik úshtikti reseılik Stanıslav Voljentsev qorytyndylady. Ol jeńimpazdan 1 sekýndqa qalyp qoıdy.
