Qazaqstandyq «Shal» fılmi «Oskar» syılyǵyna usynyldy
ASTANA. 9 qazan. QazAqparat - Sh.Aımanov atyndaǵy «Qazaqfılm» AQ túsirgen, rejısser Ermek Tursynovtyń «Shal» fılmi «Shetel tilindegi úzdik fılm» degen atalym boıynsha «Oskar» syılyǵyna usynyldy.
Kınokartına álemniń 76 eliniń kınorejısserleriniń jumystarymen synǵa túsedi. Olardyń arasynda Fedor Bondarchýktyń «Stalıngrad» fılmi de bar. Amerıka kınoakademııasynyń saıtynda jarııalanǵan úmitkerlerdiń arasynda tanymal kıno sheberleri Danıs Tanovıch, Tomas Vınterberg, Andjeı Vaıda men Kong Kar-Vaı bar.
«Shal» kartınasy Ernest Hemıngýeıdiń «Shal men teńiz» povesiniń jelisi boıynsha túsirilgen. Munda shalǵaıdaǵy dalada ómir súretin quramynda shal, nemeresi jáne kelini bar qarapaıym otbasy jaıly baıandalady. Olar tirshiliktegi mańyzdy shyndyqty joǵaltyp almaý úshin bir-birin keshire bilip, kóregendilik kórsetýleri kerek. Túıtkilge toly ómirde adamı ǵumyr keship, nemeresine ómirdiń basty qundylyqtaryn jetkizip úlgerýi tıis.
Eske sala keteıik, «Shal» fılmi 2012 jyldyń 11-shi qazanynda shyǵyp, kórermender ony jyly qabyldaǵan bolatyn. Sol jyldyń qarasha aıynda kartına «Jyl tańdaýy» syılyǵynyń «Jyl fılmi» atalymyna ıe boldy. Al akter Erbolat Toǵuzaqov «Altyn Adam» altyn músininiń ıegeri atandy. 2013 jyldyń qyrkúıeginde «KınoShok-2013» ashyq festıvaliniń Gran-prı júldesine ıe bolsa, akter Erbolat Toǵuzaqov úzdik er adam beınesi úshin marapattaldy.
2010 jyly Ermek Tursynovtyń «Kelin» kartınasy «Oskar» syılyǵynyń short-paraǵyna engizildi.
«Oskar» syılyǵyn saltanatty tabystaý rásimi 2014 jyly 2-shi naýryzda Los-Andjeleste ótedi.
