Qazaqstandyq shahmatshylar komandasy Rýmynııada qar qursaýynda qaldy
ASTANA. QazAqparat - Álem chempıonatyna jol tartqan qazaqstandyq jas shahmatshylar komandasy jáne olardyń ata-analary qardyń tolassyz jaýýynan Rýmynııada turyp qaldy. Bul týraly «Bıbisara» JShS dırektory Isataı Ańsat óziniń Facebook paraqshasynda málim etti, dep habarlaıdy «QazAqparat» HAA tilshisi.
«Biz (jas shahmatshylar komandasy men olardyń ata-analary) keshe 20 sáýir kúni ıAssy (Rýmynııa) qalasyna shahmattan álem chempıonatyna qatysý úshin Astanadan (Kıev arqyly) Kıshınev qalasyna ushtyq. Kıshınevke áreń qondyq, qatty boran boldy. Qalany aınalshyqtap, bir saǵat ushyp júrdik. Ushqysh birneshe ret árekettenip, ushaqty áreń qondyrdy», - dep jazdy Isataı Ańsat.
Biraq, jas sportshylardyń oqıǵasy munymen bitpeıdi.
«Jerge qonǵan soń, men borandy túni jol júrmeı, Kıshınevte qala turýdy usyndym. Biraq, rýmynııalyq júrgizýshi meni túsinbedi nemese óziniń basqa josparlary boldy ma eken, Kıshınevten ıAssy qalasyna jolǵa shyqtyq. Júrgizýshi jaqsy júrgizedi, jaı jyldamdyqpen tań ata Pýsh qalasyna 10 shaqyrym jerde jolda turyp qaldyq. ıAssyǵa deıin áli 80 shaqyrym bar. Jol tazalap júrgen kólikter bar, degenmen jetkiliksiz. Bir orynda turǵanymyzǵa 3 saǵat boldy. Sýymyz azaıdy, balalar tańǵy as ishpedi. Avtobýsta 25 qazaqstandyq bar. Sizderden Syrtqy ister mınıstrligine jáne Qazaqstannyń Rýmynııadaǵy Elshiligine habar berýdi suraımyz. Bizde baılanys joq. Qazir joldyń boıyndaǵy adamdardan ınternetke kirý núktesin surap kóremin», - dep habarlady I.Ańsat.
Óz kezeginde «Bıbisara» JShS dırektorynyń orynbasary Dáýren Ábýov QazAqparat tilshisine bolǵan oqıǵany rastady.
«Qazir ǵana sóılestim, olar áli joldyń boıynda tur», - dedi ol.
Atap óteıik, búgin Rýmynııanyń taýly aýdandaryna qar jaýdy.
