Qazaqstandyq «Shaǵala» ushqyshsyz ushý apparatynyń kezekti synaǵy sátti ótti
Atalǵan qurylǵyny Qorǵanys mınıstrliginiń tapsyrysymen Qazaqstan Respýblıkasynyń Tuńǵysh Prezıdenti – Elbasy atyndaǵy Ulttyq qorǵanys ýnıversıtetiniń áskerı ǵalymdary ázirledi.
Qazirgi ýaqytta bul apparat synaqtardyń sońǵy satysynan ótkizilýde.
Ol túrli aýa raıy men árkelki jer jaǵdaılarynda birneshe ret synalyp, jaqsy nátıje kórsetti.
– «Shaǵala» ushý apparatynan, jer ústi segmentinen turady jáne sońǵy úlgidegi tehnologııamen jabdyqtalǵan júıe. Bul qazaqstandyq áskerı ǵalymdar tolyq shyǵarǵan alǵashqy joǵary tehnologııalyq ónim. Jeke baǵdarlamalyq jasaqtamasy – onyń basty ereksheligi bolyp tabylady.
Apparattyń birneshe qorǵanys deńgeıi bar. Bul biz daıyndaǵan ónim, – dep atap ótti Ulttyq qorǵanys ýnıversıtetiniń bastyǵy general-leıtenant Sultan Qamaletdınov.
Ushqyshsyz ushý apparaty baǵyt boıynsha ushýda, jerdegi obektilerden aqparat alyp, ony operatorǵa jetkizedi. Barlaý avıatsııalyq kesheniniń ushý qashyqtyǵy – 30 shaqyrymdy, barynsha jyldamdyǵy – 110 km/saǵ, teńiz deńgeıinde eń bıik ushýy – 3500 metrdi quraıdy. Áýede eki saǵat bolyp, jel sekýndyna 14 metrge deıin kúsheıgen kezde beriktigin saqtaıdy.
Bul qurylǵy otandyq baǵdarlamalyq-apparattyq baılanys arnasymen, sonymen qatar krıptografıkalyq hattamamen jabdyqtalǵan.
«Shaǵala» ushqyshsyz ushý qurylǵysy tehnıkalyq sıpattamasy jaǵynan sheteldik qurylǵylardan kem túspeıdi, sonymen qosa onyń baǵasy sheteldik úlgilerden aıtarlyqtaı tómen.
Qorǵanys mınıstri general-leıtenant Nurlan Ermekbaev synaqty baqylady. Ol «Shaǵalanyń» qazirgi tańda Qazaqstanda áskerlerdiń oqý-jattyǵý kezinde paıdalanatyn barlaý-atý jáne barlaý-soqqy berý keshenine aınalatyn elementterdiń biri bolýy múmkin ekenin atap ótti.
