Qazaqstandyq shabandozdar Búkilálemdik kóshpendiler oıyndarynda bir altyn men eki kúmis ıelendi
ASTANA. QazAqparat - Sholpan Ata qalasynda ótip jatqan Búkálemdik kóshpendiler oıyndarynyń sońǵy kúninde aýqymdy at jarystary oryn aldy. «Qunan chabysh» jarysynda qazaqstandyq sportshylar altyn jáne kúmis medal ıelendi.
16 jastaǵy Almaty oblysynyń týmasy Ernat Raqymǵalı «Attıla» atty aǵylshyn tuqymdas eki jasar qulynmen basqalarynan oq boıy ozyp shyǵyp, jeńimpaz atandy. At ıesi Almaty qalasynyń turǵyny Rahymjan Dildaev eken.
Al 16 jastaǵy Taıson Koptev «Tıtan» atty aǵylshyn tuqymdas qulynmen kúmis júldege qol jetkizdi. Bul júıriktiń ıesi - jambyldyq Esbol Shyntasov.
Tórtinshi oryndy «Báseke» atty tulpardy tizgindegen qatysýshy aldy. Ol aqshalaı syılyq sertıfıkatyna ıe boldy. Ol attyń da ıesi Esbol Shyntasov bolyp shyqty. «Jorgo salysh» jarysynyń baǵdarlamasynda barlyq júldeli oryndardy qyrǵyzdyq shabandozdar ıelendi. Bul saıysqa Qazaqstannyń atynan tek bir adam qatysqan edi. «Alaman báıge» jarysynyń aqtyq synynda kóp daý-damaı týyndap qaldy. Sebebi, qyrǵyzdyq tóreshiler jergilikti sportshy jeńimpaz atanýy tıis, al qazaqstandyq sportshy ekinshi bolyp keldi, dep jeńistik bermedi. Bul turǵyda qazaqstandyq sport delegatsııasynyń jarys máresiniń beınejazbasyn qaıtalap kórsetý týraly talaptary eskerýsiz qaldyryldy. Nátıjesinde, bul dodada kúmis júlde men 500 myń som kólemindegi júldeni Ǵabıt Úmbetovtyń «Qaraqus» atty tulparymen Almaty oblysynan kelgen shabandoz 12 jastaǵy Aqjol Orazymbetov qanjyǵalady.
